‘त्या’ आरोपींना पोलीस कोठडी

सिरसोलीतील आत्महत्येस प्रवृत्त केल्याचे प्रकरण

लोकमत न्यूज नेटवर्क
हिवरखेड : सिरसोली येथील इसमास आत्महत्येस प्रवृत्त केल्याप्रकरणी गुन्हे दाखल असलेल्या तिन्ही आरोपींना हिवरखेड पोलिसांनी अटक केली. या तिन्ही आरोपींना न्यायालयात हजर केले असता न्यायालयाने त्यांना ५ जुलैपर्यंत पोलीस कोठडी सुनावली आहे.
पोलिसांनी विनयभंगाच्या तक्रारीत चौकशीसाठी बोलावलेल्या सिरसोली येथील गजानन इंगळे यांनी विष प्राशन करून आत्महत्या करण्याचा प्रयत्न केला होता. २६ जून रोजी त्यांचा मृत्यू झाला होता. याप्रकरणी इंगळे यांच्या पत्नी सुनंदा गजानन इंगळे यांनी दिलेल्या फिर्यादीवरून हिवरखेड पोलिसांनी मोबीनअली सबदरअली, इमदादअली सबदरअली, इम्रानअली ऊर्फ नातीकअली इमदादअली यांच्याविरुद्ध कलम ३०६, ३२३, ५०६, ३४ अन्वये गुन्हा दाखल केला आहे. गुन्हा दाखल झाल्यानंतर तीनही आरोपी पसार झाले होते. यातील मोबीन अली सबदर अली व इमदादअली सबदरअली यांना शनिवारी पोलिसांनी अटक केली आहे.
तिसऱ्या आरोपीलाही हिवरखेड पोलिसांनी अटक केली होती. तीनही आरोपींना न्यायालयासमोर हजर केले असता न्यायालयाने त्यांना ५ जुलैपर्यंत पोलीस कोठडी सुनावली. पुढील तपास हिवरखेड पोलीस करीत आहेत.