चोरीस गेलेला २६ लाखांचा मुद्देमाल फिर्यादींना केला परत

अकोला : जिल्ह्यातील विविध पोलीस ठाण्याच्या हद्दीतील घडलेल्या चोरी, तसेच विविध घटनेतील रोख रक्कम आणि वाहनांसह इतर मुद्देमाल परत करण्यासाठी पोलीस अधीक्षक जी. श्रीधर यांच्या संकल्पनेतून विशेष उपक्रम राबवून हा मुद्देमाल संबंधित फिर्यादींना बुधवारी परत करण्यात आला आहे. जिल्ह्यातील विविध पोलीस ठाण्याच्या हद्दीतील फिर्यादींना तब्बल २५ लाख ८० हजार ४८६ रुपयांचा मुद्देमाल परत करण्यात आला आहे.

जिल्ह्यातील विविध पोलीस ठाण्याच्या हद्दीतून चोरीस गेलेला मुद्देमाल स्थानिक गुन्हे शाखा, तसेच पोलिस ठाण्याच्या पथकांनी चोरट्यांना ताब्यात घेऊन जप्त केला आहे. त्यानंतर आवश्यक ती प्रक्रिया झाल्यानंतर हा मुद्देमाल परत करण्यासाठी पोलीस अधीक्षक जी. श्रीधर यांनी विशेष कार्यक्रम आयोजित करून हा मुद्देमाल संबंधित फिर्यादींना परत केला. प्रत्येक पोलीस ठाण्याच्या स्तरावर कार्यक्रम आयोजित करून हा मुद्देमाल परत करण्यात आला आहे. यामध्ये ९ लाख १५ हजार किमतीचे २० चोरीस गेलेली वाहने त्यांच्या मालकांना परत करण्यात आली आहेत. यासोबतच ९ लाख २४ हजार ८७१ रुपयांचे ६९ मोबाईल परत करण्यात आले आहे. ४ लाख ५२ हजार ३५८ रुपयांचे सोने व चांदीचे दागिने फिर्यादींना परत करण्यात आले आहे. यासोबतच २ लाख ८८ हजार २५७ रुपयांचा इतर मुद्देमाल असा एकूण २५ लाख ८० हजार ४८६ रुपयांचा मुद्देमाल जप्त करण्यात आला असून, तो परत करण्यात आला आहे.

----------------------

एका वर्षांत तीन कोटी ७५ लाखांचा मुद्देमाल परत

पोलीस अधीक्षक जी. श्रीधर यांनी अकोला पोलीस दलाची कमान सांभाळल्यानंतर विविध उपक्रम राबविले. याच दरम्यान ज्या फिर्यादीचा मुद्देमाल चाेरी गेला ताे तपास करून शाेधून त्यांना परत करण्यासाठी दर महिन्याच्या ३० किंवा ३१ तारखेला परत करण्यासाठी विशेष उपक्रम राबविला़ या मोहिमेअंतर्गत जुलै २०२० ते जुलै २०२१ या एका वर्षाच्या कालावधीत जिल्ह्यातील नागरिकांना सुमारे तीन कोटी ७५ लाख ६ हजार ९३४ रुपयांचा मुद्देमाल परत करण्यात आला आहे. त्यामुळे ज्या व्यक्तींचा हा मुद्देमाल चोरीस गेल्यानंतर परत मिळाला त्यांनी पोलीस अधीक्षक जी. श्रीधर व अकोला पोलिसांचे आभार मानले आहे.