सलून व्यावसायिक पुन्हा झाले हतबल

लोकमत न्यूज नेटवर्क

अकाेला : हातावर पाेट असलेल्या सलून व्यावसायिकांना वाढलेल्या लाॅकडाऊनमुळे राेजगाराची चिंता लागून आहे. राज्य सरकारने लॉकडाऊनची मुदत पुन्हा १५ दिवस वाढवल्याने सलून व्यावसायिक हतबल झाले आहेत. मागील १५ दिवसात कसलीही शासकीय मदत मिळाली नसतानाही तग धरून दिवस काढणाऱ्या या व्यावसायिकांसमाेर आता उदरनिर्वाहाचा प्रश्न उभा ठाकला आहे.

अकाेला जिल्ह्यामध्ये मागील १५ दिवसांपासून हा व्यवसाय ठप्प आहे. राज्यात ‘ब्रेक द चेन’ लागू करताना दुर्बल घटकांना आणि कारागीर, लघु व्यावसायिकांना अर्थसाहाय्य देण्याची घोषणा सरकारने केली होती.

प्रत्यक्षात मागणी करूनही सलून व्यावसायिकांचा या मदतीमध्ये विचार झाला नाही. गतवर्षीच्या लॉकडाऊनमध्ये तब्बल सात महिने व्यवसाय बंद होता. यामुळे अनेकजण कर्जबाजारी झाले. राज्यभरातील सलून व्यावसायिकांनी आत्महत्या केल्या. नागपुरात आणि विदर्भातही आत्महत्यांच्या घटना घडल्या. हा अनुभव लक्षात घेता, यावेळी लॉकडाऊन लागू करताना सरकारकडून अर्थसाहाय्य मिळण्याची अपेक्षा होती. मात्र, आंदोलने करूनही ही मागणी दुर्लक्षित राहिली. लॉकडाऊनला पुन्हा १५ दिवसांची मुदतवाढ मिळाल्याने सलून कारागिरांचा संयम सुटला आहे. जगण्याचा आणि कुटुंबाला जगविण्याचा प्रश्न या वर्गासमोर असल्याने जटील सामाजिक समस्या निर्माण झाली आहे. ही अवस्था लक्षात घेऊन सरकारने सर्व सलून कारागीर, दुकानदारांना अर्थसहाय्य द्यावे, अशी मागणी अकाेला जिल्हा नाभिक दुकानदार संघटनेचे अध्यक्ष गजानन वाघमारे यांनी केली आहे.

सरकारने मदतीचे पॅकेज द्यावे

गतवर्षीच्या लाॅकडाऊनमध्ये समाजसेवी संस्थांकडून धान्याचे किट मिळाल्याने मदत झाली. यंदा परिस्थिती विपरीत आहे. रुग्णसंख्या वाढली आहे, उपचारासाठी पैसा नाही. आजाराने मरण्यासोबतच सरकारने समाजातील कारागिरांना आणि व्यावसायिकांना उपाशी मारू नये. सरकारने ज्याप्रमाणे इतर घटकांसाठी पॅकेज जाहीर केले आहे, त्याचप्रमाणे सलून व्यावसायिकांनाही मदतीचे पॅकेज जाहीर करावे, अशी मागणी वाघमारे यांनी केली आहे.