माध्यमिक शाळेची घंटा वाजली, प्राथमिकही लवकरच सुरू होणार !

जिल्ह्यात ३५६ शाळा सुरू

जिल्ह्यात माध्यमिकच्या इयत्ता आठवी ते बारावीपर्यंतच्या ३७१ शाळांपैकी ३५६ शाळा सुरू झाल्या आहेत; परंतु विद्यार्थ्यांची उपस्थिती कमी आहे. प्राथमिकच्या शाळा सुरू करण्यात आल्या; परंतु विद्यार्थ्यांना शाळेत येण्याची परवानगी शासनाने अद्याप दिलेली नाही. तोंडी सूचना असल्यामुळे संभ्रम आहे.

सॅनिटायझेशन करा, पैसे देणार कोण?

शासनाने माध्यमिक शाळा सुरू केल्या. आता प्राथमिक शाळा सुरू करण्याच्या हालचालीही सुरू केल्या आहेत; परंतु शाळा, वर्गांचे सॅनिटायझेशन करावे लागणार आहे. त्यासाठी पैसा कोण देणार, असा प्रश्न उपस्थित होत आहे. शिक्षण विभागाने मेंटनन्स अनुदान दिले असून, त्यातून हा खर्च भागविण्यास सांगितले आहे.

तोंडी आदेशामुळे मुख्याध्यापकांसमोर पेच

प्राथमिक शाळा सुरू करण्यास शासनाने अद्याप परवानगी दिली नसली तरी, शिक्षण विभागाच्या अधिकाऱ्यांनी तोंडी सूचना दिल्या आहेत. पालकांची संमती, ग्रामपंचायतीचा ठराव, न.प., मनपा यांची संमती असल्यास आणि कोरोनामुक्त परिसर, गाव असल्यास शाळा सुरू कराव्यात, अशा सूचना आहेत; परंतु लेखी नसल्यामुळे मुख्याध्यापकांसमोर पेच निर्माण झाला आहे. शाळा सुरू केल्यानंतर मुलांच्या आरोग्याची समस्या निर्माण झाल्यास कोण जबाबदारी घेईल, असाही प्रश्न आहे.

माध्यमिकच्या शाळा सुरू आहेत. प्राथमिक शाळांमधील शिक्षक, मुख्याध्यापक शाळांमध्ये जात आहेत; परंतु प्राथमिक शाळा सुरू करण्याबाबत शासनाचे आदेश नाहीत. परिस्थिती पाहून शाळा सुरू करण्याच्या तोंडी सूचना आहेत. त्यामुळे संभ्रम आहे.

-दिलीप तायडे, उपशिक्षणाधिकारी प्राथमिक

कोणत्या वर्गात किती विद्यार्थी?

पहिली- २९५०८

दुसरी- २९३४९

तिसरी- २९४६४

चौथी- २९८१२

पाचवी- २९७२९

सहावी- २९४३८

सातवी- २९३४०

आठवी- २८५९५

नववी- २८७५०

दहावी- ३०१७८

अकरावी- २५८३३

बारावी- २२८८९