अल्पवयीन चोरट्यांकडून सात दुचाकी जप्त

दोन अल्पवयीन दुचाकी चोरट्यांकडून तब्बल सात चोरीच्या दुचाक्या जप्त करण्यात सिटी कोतवाली पोलिसांना यश आले.

अकोला, दि. २५- शहराच्या विविध भागातून दुचाक्या चोरणार्‍या दोन अल्पवयीन दुचाकी चोरट्यांना सिटी कोतवाली पोलिसांनी रविवारी अटक केली. या दोन अल्पवयीन दुचाकी चोरट्यांकडून तब्बल सात चोरीच्या दुचाक्या जप्त करण्यात सिटी कोतवाली पोलिसांना यश आले आहे.
युसूफ अली खदान परिसरातील रहिवासी मो. यासीन मो. खुश्रीद हे शनिवारी काला चबुतरा परिसरातील एका कापड दुकानानजीक असलेल्या खासगी रुग्णालयामध्ये गेले होते. रुग्णालयासमोर त्यांनी त्यांची २0 हजार रुपये किमतीची दुचाकी क्र. एमएच-३0-क्यू - २१९३ उभी केली. ही दुचाकी अज्ञात चोरट्यांनी लंपास केल्याचे त्यांच्या निदर्शनास आल्यानंतर, त्यांनी या प्रकरणाची तक्रार सिटी कोतवाली पोलीस स्टेशनमध्ये दिली. पोलिसांनी गुन्हा दाखल करून या प्रकरणाचा तपास सुरू केला असता, त्यांना खैर मोहम्मद प्लॉट येथील दोन युवकांकडे दुचाकी असल्याची माहिती मिळाली. पोलिसांनी दोघांनाही ताब्यात घेतले असता, ते अल्पवयीन असल्याचे समोर आले. मात्र त्यांच्या घराची झडती घेतली असता, घरातून तब्बल सात चोरीच्या दुचाक्या जप्त करण्यात सिटी कोतवाली पोलिसांना यश आले. दोन्ही आरोपी अल्पवयीन असल्याने पोलिसांना कारवाई करताना अडचणी निर्माण झाल्या. सदर अल्पवयीन चोरट्यांकडे आणखी चोरीच्या दुचाक्या असल्याचा पोलिसांना संशय आहे.