अडीच वर्षांपासून अल्पयीन मुलीचे लैंगिक शोषण

Sexual abuse of a minor girl : वैद्यकीय तपासणीतून मुलगी पाच महिन्यांची गरोदर असल्याचे समोर आले.

ठळक मुद्दे आरोपीविरुद्ध गुन्हा दाखल मुलगी पाच महिन्यांची गरोदर

अकोला : अल्पवयीन मुलीला जीवे मारण्याची धमकी देत, तिला बळजबरी करीत, तिचे अडीच वर्षांपासून लैंगिक शोषण करणाऱ्या आरोपीविरुद्ध सिटी कोतवाली पोलिसांनी शुक्रवारी उशिरा रात्री गुन्हा दाखल केला. मुलीला सर्वोपचार रुग्णालयात उपचारार्थ दाखल केल्यावर वैद्यकीय तपासणीतून मुलगी पाच महिन्यांची गरोदर असल्याचे समोर आले.

बुलडाणा जिल्ह्यातील संग्रामपूर तालुक्यातील तामगाव पोलीस ठाण्याअंतर्गत येणाऱ्या एका गावातील १६ वर्षीय मुलीला जीवे मारण्याची धमकी देत, गावातीलच एका आरोपीने अडीच वर्षांपासून अल्पवयीन मुलीचे लैंगिक शोषण केले. तिने विरोध केला असता, आरोपीने तिला जीवे मारण्याची धमकी देत, तिचे सातत्याने शोषण केले. शुक्रवारी मुलीच्या पोटात अचानक दुखू लागल्याने तिला उपचारासाठी दुपारी सर्वोपचार रुग्णालय व शासकीय वैद्यकीय महाविद्यालयात दाखल केले. या ठिकाणी वैद्यकीय तपासणी केली असता, मुलगी पाच महिन्यांची गरोदर असल्याचे समोर आले. त्यामुळे तिच्या आईवडिलांना धक्काच बसला. त्यांनी मुलीला विश्वासात घेऊन तिची चौकशी केली. तेव्हा तिने तिच्यासोबत घडलेली आपबीती सांगितली. याप्रकरणी आईवडिलांनी सिटी कोतवाली पोलीस ठाण्यात धाव घेत, रात्री उशिरा तक्रार दाखल केली. त्यांच्या तक्रारीनुसार पोलिसांनी आरोपीविरुद्ध भादंवि कलम ३७६ अ, ड व पोक्सोनुसार गुन्हा दाखल केला. हा गुन्हा तामगाव पोलिसांकडे वर्ग करण्यात येणार आहे.