मधमाश्यांच्या हल्ल्यात सहा जण जखमी

कुरूम : येथून जवळच असलेल्या माटोडा येथे मधमाश्यांनी अचानक हल्ला चढविल्याने वेगवेगळ्या तीन घटनांत सहा जण गंभीर जखमी झाल्याची घटना शनिवारी सकाळी ११ वाजताच्या सुमारास घडली.

प्राप्त महितीनुसार, माटोडा येथील रहिवासी बंडू मधुकरराव बोरकर (५२) हे पत्नी माधुरी (वय ४५ वर्षे), मुलगी आकांक्षा (वय १४ वर्षे) हे तिघे जण शनिवारी सकाळी ११ वाजतादरम्यान शेतात मळणी यंत्रातून काढलेल्या गव्हाची गंजी शेतातच वाळू घालण्यासाठी गेले असता मधमाश्यांनी अचानक हल्ला चढविला. यामध्ये तिघेही जखमी झाले. दुसऱ्या घटनेत शालीकराम बोरकर (७०) व त्यांचा नातू नीलेश बोरकर (१६) यांच्यावरसुद्धा शेतात मधमाश्यांनी अचानक हल्ला करून जखमी केले. तिसरी घटना शुक्रवारी १२ मार्चला घडली. येथील अभिमान मेश्राम (४०) शेतात जात असताना शेत रस्त्यावर त्यांच्यावर हल्ला करून त्यांना जखमी केले. जखमींवर कुरूम येथील खासगी रुग्णालयात उपचार करण्यात आले.