शेतातील हरभरा तोडण्यावरून तिघांना बेदम मारहाण

अकोला : जुने शहर पोलीस ठाण्याच्या हद्दीत येत असलेल्या नवीन किराणा बाजार परिसरातील लोणी रोडवर, एका शेतात काम करीत असलेल्या तिघांनी शेतात हरभरा तोडण्यासाठी गेलेल्या युवकांना रोखले असता, या युवकांनी तिघांना बेदम मारहाण केल्याची घटना रविवारी सायंकाळी घडली. या प्रकरणी जुने शहर पोलीस ठाण्यात तक्रार दिल्याची माहिती आहे.

लोणी रोडवरील एका शेतात आतिक अहमद, काशिफ अहमद आणि शेख इसारार हे तिघे जण काम करीत होते. यावेळी या परिसरातील रहिवासी काही युवक शेतातील हरभरा तोडण्यासाठी आले असता, या तिघांनी त्यांना रोखले. त्यामुळे हरभरा तोडण्यासाठी आलेल्या युवकांनी त्या शेतकऱ्यांना बेदम मारहाण केली. या मारहाणीत जखमी झालेल्या शेतकऱ्यांना तातडीने सरकारी रुग्णालयात उपचारासाठी दाखल करण्यात आले आहे. मारणारे युवक हे शिवसेना वसाहत परिसरातील असल्याची माहिती समोर आली आहे. या प्रकरणाची तक्रार पोलिसात देण्यात आली असून, पोलिसांनी प्रकरणाची चौकशी सुरू केली आहे.