ट्रॅक्टर-दुचाकी अपघात; दोन ठार

भरधाव ट्रॅक्टरने दुचाकीस धडक दिल्याने दोन जण जागीच ठार झाल्याची घटना ८ जून रोजी रात्री कारंजा तालुक्यातील जानोरीजवळ घडली.

लोकमत न्यूज नेटवर्क
अकोला: भरधाव ट्रॅक्टरने दुचाकीस धडक दिल्याने दोन जण जागीच ठार झाल्याची घटना ८ जून रोजी रात्री कारंजा तालुक्यातील जानोरीजवळ घडली. अपघातानंतर ट्रॅक्टरचालकाने घटनास्थळावरून पळ काढला.
लहू धर्मा मोहिते (४०) रा. दधम ता. खामगाव जिल्हा बुलडाणा व देवदास श्रावण मोहिते (रा. गौढाळा ता. खामगाव जिल्हा बुलडाणा) हे दुचाकी क्र.एमएच ४२ एमपी २७८० ने सोयरीक संबंध आटोपून जानोरी ते काजळेश्वर रस्त्याने जात होते. दरम्यान, जानोरीजवळील नाल्यावर ट्रॅक्टर क्र.एमएच ३७ ए ६०८५ ने त्यांच्या दुचाकीस जबर धडक दिली. यामध्ये दोघांचाही घटनास्थळीच मृत्यू झाला. घटनेची माहिती मिळताच अकोला जिल्ह्यातील पिंजर येथील आपत्कालीन पथकाचे समाधान डेरे व आशिष मुळे यांनी घटनास्थळावर धाव घेतली. तसेच पिंजरचे ठाणेदार सुनील सोळुंके यांनीही हद्दीत नसतानाही घटनास्थळाला भेट दिली. अपघातानंतर ट्रॅक्टर चालकाने घटनास्थळावरून पळ काढला.