ट्रक-कंटेनरची धडक; चालक गंभीर जखमी

कुरूम : राष्ट्रीय महामार्ग क्र. सहावरील कुरूमनजीक ज्ञानेश्वर मोंढे यांच्या शेताजवळ ट्रक-कंटेनरची अमोरासमोर धडक होऊन झालेल्या अपघातात कंटेनर चालक गंभीर जखमी झाल्याची घटना २० फेब्रुवारी राेजी दुपारी ४.३० वाजताच्या सुमारास घडली.

अकोल्यावरून अमरावतीकडे कपड्याच्या गठाणी घेऊन जाणारा कंटेनर क्र. एनएल ०१ एसी ८६४६ची व अमरावतीकडून अकोल्याकडे जाणारा ट्रक सीजी ०४ जेडी २४२९ ची समोरासमोर धडक झाली. यात कंटेनरचा चालक विशालकुमार प्रसाद रा. बिहार याच्या पायाला मार लागल्याने हा गंभीर जखमी झाला.

या घटनेची माहिती मिळताच माना पोलीस स्टेशनचे पोलीस उपनिरीक्षक घनश्याम पाटील, हे.कॉ. दिलीप नागोलकर, ना. पो.कॉ. नंदकिशोर टिकार, पो.कॉ. विनोद तायडे, नीलेश इंगळे, विठ्ठल राठोड, वैभव येळने, गृहरक्षक रामेश्वर वानखडे यांनी घटनास्थळी धाव घेत कंटेनरच्या कॅबिनमध्ये फसलेल्या गंभीर जखमी चालकाला काढून १०८ क्रमांकाच्या रुग्णवाहिकेने उपचाराकरिता अमरावती येथील इर्विन जिल्हा रुग्णालयात दाखल केले. यावेळी ट्रक व कंटेनरच्या कॅबिनचे मोठ्या प्रमाणात नुकसान झाले.

अपघात झाला यादरम्यान काही वेळ वाहतूक व्यवस्था विस्कळीत झाली होती, परंतु पोलिसांनी महामार्गाच्या चौपदरीकरण निर्माणाधीन मार्गावर वाहतूक वळवून सुरळीत केली.