ट्रकची दुचाकीस धडक; युवक ठार

ट्रकला ओव्हरटेक करताना दुचाकीवरील संतुलन सुटल्याने ट्रकच्या मागच्या चाकाखाली येऊन ३५ वर्षीय युवकाचा घटनास्थळीच मृत्यू झाल्याची घटना २७ जुलै रोजी दुपारी ३ वाजताच्या दरम्यान घडली. अपघातानंतर संतप्त जमावाने दोन्ही सिमेंटने भरलेले ट्रक पेटविले. चालक मात्र फरार झाला.

ठळक मुद्देसंतप्त जमावाने ट्रक पेटविलाकातखेड येथील घटना

लोकमत न्यूज नेटवर्क
विझोरा : ट्रकला ओव्हरटेक करताना दुचाकीवरील संतुलन सुटल्याने ट्रकच्या मागच्या चाकाखाली येऊन ३५ वर्षीय युवकाचा घटनास्थळीच मृत्यू झाल्याची घटना २७ जुलै रोजी दुपारी ३ वाजताच्या दरम्यान घडली. अपघातानंतर संतप्त जमावाने दोन्ही सिमेंटने भरलेले ट्रक पेटविले. चालक मात्र फरार झाला.
बार्शीटाकळी तालुक्यातील परंडा येथील रहिवासी गजानन सुरेश काटोले व संदीप अजाबराव वानखडे हे दोघेही अकोला येथून एमएच ३० एक्स ५०५३ क्रमांकाच्या दुचाकीने काम आटोपून विझोरा मार्गे घरी परत येत होते. कातखेड गावासमोर सिमेंटने भरलेल्या एमएच ३० एल २३३८ क्रमांकाच्या ट्रकला ओव्हरटेक करण्याच्या प्रयत्नात दुचाकीवरील नियंत्रण सुटल्याने मागच्या चाकाखाली येऊन गजानन काटोले जागीच ठार झाला.
संदीप अजाबराव वानखडे हा किरकोळ जखमी झाला. घटनेची माहिती कळताच मोठा जमाव येथे जमा झाला. सिमेंटने भरलेल्या दोन्ही ट्रकची संतप्त जमावाने तोडफोड करून ट्रक पेटविले. घटनेची माहिती होऊनही बार्शीटाकळी पोलीस तब्बल एक तासाने तेथे पोहोचले. अपघातास कारणीभूत असलेला ट्रकचालक फरार होण्यात यशस्वी झाला. याप्रकरणी अज्ञात ट्रकचालकाविरुद्ध बार्शीटाकळी पो.स्टे.मध्ये गुन्हा दाखल करण्यात आला आहे.