दुचाकींची समोरासमोर धडक; दोघांचा मृत्यू
By लोकमत न्यूज नेटवर्क | Published: November 3, 2020 10:56 AM2020-11-03T10:56:25+5:302020-11-03T10:56:37+5:30
Akola News अकोला ते पातूर रोडवरील रुद्रायणी फार्मजवळ भरधाव दुचाकींची समोरासमोर जबर धडक झाली.
दुचाकींची समोरासमोर धडक; दोघांचा मृत्यू
पातूर: अकोला ते पातूर रोडवरील रुद्रायणी फार्मजवळ भरधाव दुचाकींची समोरासमोर जबर धडक झाली. यात दोन दुचाकीस्वारांचा जागीच मृत्यू झाला. ही घटना सोमवारी सकाळी घडली. याप्रकरणी जुने शहर पोलिसांनी गुन्हा दाखल केला.
माझाेड येथील विनायक अमृता वडतकार (६०) हे दुचाकीने अकोल्याला तेरवीच्या कार्यक्रमाला जात असताना अकोला ते पातूर रोडवरील रुद्रायणी फार्मजवळ समोरून येणाऱ्या भरधाव दुचाकीने त्यांच्या दुचाकीला जबरदस्त धडक दिली. यात दोन्ही मोटारसायकलस्वारांचा जागीच मृत्यू झाला.
पातूर पोलीस स्टेशन अंतर्गत असलेल्या माझोड येथील मृतक विनायक अमृता वडतकर हे एमएच ३० एडब्लू ३२१२ क्रमांकाच्या दुचाकीने चुलत भाऊ शरद विष्णू वडतकार यांचयासोबत अकोला येथे तेरवीच्या कार्यक्रमाला जात होते. अजाबराव ठाकरे दुसऱ्या मोटारसायकलने त्यांच्या मागे होते. सकाळी साडेनऊ वाजताच्या दरम्यान अकोला पातूर रोडवरील रुद्रायणी फार्मजवळ समोरून येणाऱ्या एसटी बसच्या मागून ओव्हरटेक करीत एमएच ३० एएल २६३२ क्रमांकाच्या भरधाव दुचाकीने वडतकार यांच्या दुचाकीला धडक दिली. यात विनायक वडतकार व शिवा ऊर्फ शिवशंकर वाघमारे(२८ रा. तळेगाव) यांचा मृत्यू झाला. शरद वडतकार यांच्या फिर्यादीवरून मृतक शिवा ऊर्फ शिवशंकर वाघमारे यांच्याविरुद्ध पोलिसांनी गुन्हा दाखल केला.
