अज्ञात वाहनाची दुचाकीस धडक; महिला ठार

मूर्तिजापूर : अज्ञात वाहनाने पाठीमागून दिलेल्या धडकेत दुचाकीवर मागे बसलेली महिला जागीच ठार झाल्याची घटना राष्ट्रीय महार्गावरील एका ढाब्याजवळ २२ डिसेंबर राेजी दुपारी २ वाजेच्या सुमारास घडली. स्वाती श्रीकृष्ण अनभोरे (४५, रा. मुंबई) असे ठार झालेल्या महिलेचे नाव आहे.

स्वाती श्रीकृष्ण अनभोरे या लग्नपत्रिका देण्यासाठी काही दिवसांपूर्वी मामाकडे आल्या होत्या. मंगळवारी त्या दुचाकीने (एमएच ३० एपी ५५९) अकोल्यावरून मूर्तिजापूरकडे येत असताना गावालगतच्या वैशाली ढाब्याजवळ पाठीमागून येणाऱ्या अज्ञात वाहनाने त्यांना जोरदार धडक दिली. यात त्या रस्त्यावर कोसळून ठार झाल्या. दुचाकीचालकाला किरकोळ दुखापत झाली आहे. घटनेची माहिती मिळताच वंदे मातरम‌् आपत्कालीन पथकाने घटनास्थळी धाव घेऊन मृतदेह उत्तरीय तपासणीसाठी येथील लक्ष्मीबाई देशमुख उपजिल्हा रुग्णालयात आणला.