ट्रकच्या धडकेत दुचाकीस्वार ठार

मूर्तिजापूर : माना पोलीस स्टेशन हद्दीत येत असलेल्या जामठी फाट्याजवळ राष्ट्रीय महामार्गावर उमा नदीच्या पुलानजीक भरधाव ट्रकने दुचाकीला पाठीमागून धडक दिल्याने दुचाकीस्वार ठार झाल्याची घटना शनिवारी दुपारी ३.१५ वाजताच्या सुमारास घडली. सतीश रघुनाथ सुलताने (३८) असे मृताचे नाव आहे.

अमरावती येथील रहिवासी असलेले सतीश रघुनाथ सुलताने (३८) हे दुचाकीने (क्रमांक एमएच २७ केएल ८२२७) अमरावतीहून मूर्तिजापूरकडे येत असताना पाठीमागून येणाऱ्या भरधाव ट्रकने (क्रमांक एमएच ४८ सी ८६४९) जबर धडक दिली. या अपघातात दुचाकीस्वार सतीश सुलताने यांचा जागीच मृत्यू झाला. घटनेची माहिती मिळताच माना पोलीस ठाण्याचे उपनिरीक्षक घनश्याम पाटील व त्यांचे सहकारी तसेच वंदेमातरम् आपत्कालीन पथक घटनास्थळी तात्काळ दाखल झाले. आपत्कालीन पथकाच्या मदतीने मृतदेह लक्ष्मीबाई देशमुख उपजिल्हा रुग्णालयात शवविच्छेदनासाठी पोहचविला. अधिक तपास ठाणेदार कैलास भगत यांच्या मार्गदर्शनाखाली माना पोलीस करीत आहेत.