११वी प्रवेशाकरिता साडेचार हजार अर्ज दाखल

इयत्ता ११ वीच्या केंद्रीय प्रवेश पध्दतीत अर्ज स्वीकारणे सुरु असून पहिल्या दिवशी अर्ज दाखल करण्यासाठी विद्यार्थ्यांनी गर्दी केली होती. मात्र दुसऱ्या दिवशी मंगळवारी विद्यार्थ्यांची गर्दी ओसरली होती.

अमरावती : इयत्ता ११ वीच्या केंद्रीय प्रवेश पध्दतीत अर्ज स्वीकारणे सुरु असून पहिल्या दिवशी अर्ज दाखल करण्यासाठी विद्यार्थ्यांनी गर्दी केली होती. मात्र दुसऱ्या दिवशी मंगळवारी विद्यार्थ्यांची गर्दी ओसरली होती. १४ केंद्रावर आतापर्यंत ४ हजार ८६८ अर्ज प्राप्त झाले आहेत.
शहरात सुमारे ५० महाविद्यालये असून त्यामध्ये कला, वाणिज्य, विज्ञान व व्यावसायिक अभ्यासक्रमाच्या शाखानिहाय ९ हजार ३५५ विद्यार्थ्यांची प्रवेश क्षमता आहे. २७ जूनपासून शाळा व कनिष्ठ महाविद्यालय स्तरावर अकरावी प्रवेश प्रक्रियेच्या अर्ज वितरणाला सुरवात करण्यात आली होती. शहरातील १४ महाविद्यालयामध्ये अर्ज वितरणाची प्रक्रिया राबविल्या गेली. यामध्ये आतापर्यंत ७ हजार ५०० अर्जाची विक्री विविध महाविद्यालयांतर्गत झाली आहे.
महाविद्यालयातील गर्दी ओसरली
१ जुलैपासुन अर्ज स्विकृतीला सुरुवात होताच पहील्याच दिवशी शहरातील विविध महाविद्यालयातमध्ये विद्यार्थ्यांनी अर्ज देण्याकरीता प्रचंड गर्दी केली होती. पहिल्याच दिवशी २ हजार ८१५ अर्ज तर दुसऱ्या दिवशी मंगळवारी २ हजार ५३ अर्ज विविध महाविद्यालयात स्वीकृत करण्यात आले.मात्र दुसऱ्या दिवशी शहरातील महाविद्यालयामध्ये फारशी गर्दी दिसून आली नाही.शहरातील १४ सगणकीय केन्द्रावर अर्ज स्विकृती सुरु असुन ४ जुलैपर्यंत अर्ज स्विकारले जातील.
विज्ञान व वाणिज्य शाखेकडे कल
अकरावी प्रवेशकरीता शहरातील विविध महाविद्यालयात अर्ज भरण्याकरीता विद्यार्थ्यांची गर्दी पाहायला मिळाली. यावर्षी अर्ज स्विकृतीदरम्यान काही विद्यार्थ्यांशी सवांद साधला असता विज्ञान व वाणिज्य शाखेत प्रवेशाकरिता विद्यार्थ्यांचा अधिक कल आहे.