गावाहुन परतताना माय-लेकी अचानक बेपत्ता; पाच दिवसांपासून शोध सुरू

प्रणालीने पती संजय यांना फोनवरून परत येत असल्याची माहिती दिली. यामुळे संजय हा मोझरी येथे दुपारी १ वाजता पोहोचला व बस थांब्यावर प्रणालीची प्रतीक्षा करत होता.

कुऱ्हा (अमरावती) : अंजनगाव ते मोझरी प्रवास करीत असलेल्या २५ वर्षीय विवाहितेसह तिची मुलगी बेपत्ता झाली आहे. १० सप्टेंबर रोजी ही घटना घडली. माहेरी महालक्ष्मी उत्सवाला हजर राहून परत येताना ही घटना घडल्याचे तक्रारीत नमूद आहे.

तिवसा तालुक्यातील वऱ्हा येथील संजय बेहरे यांची पत्नी प्रणाली बेहरे (वय २५) व मुलगी कृष्णाली बेहरे या महालक्ष्मीकरिता अंजनगाव सुर्जी तालुक्यातील खोडगाव येथे माहेरी गेल्या. वडील अशोक अस्वार यांनी मुलगी व नात यांना १० सप्टेंबरला सकाळी १० वाजता अंजनगाव सुर्जी येथून वऱ्हा येथे येण्याकरिता ट्रॅव्हल्समध्ये बसविले. मोझरी येथे त्या उतरणार होत्या. प्रणालीने पती संजय यांना फोनवरून ही माहिती दिली. यामुळे संजय हा मोझरी येथे दुपारी १ वाजता पोहोचला व बस थांब्यावर प्रणालीची प्रतीक्षा करत होता. वेळ झाला म्हणून संजयने पत्नी प्रणालीला फोन केला. पण, तिने फोन उचलला नाही.

संजय यांनी रात्री १० वाजता सासरी फोन केला. प्रणाली व कृष्णाली अद्यापही आल्या नसल्याचे सांगितले. यामुळे माहेरच्या मंडळींचीही पाचावर धारण बसली. तातडीने सासर व माहेरच्या नातेवाइकांकडे चौकशी करण्यात आली. पण, सर्व व्यर्थ ठरले. अखेर अशोक अस्वार यांनी अंजनगाव सुर्जी पोलीस ठाणे, तर संजय बेहरे यांनी कुऱ्हा पोलीस ठाण्यात तक्रार दाखल केली. पोलीस पुढील तपास करीत आहेत.