चांदूर उपविभागात पोलीस पाटलांची ७४ पदे रिक्त

शासनाचा शेवटच्या घटकांतील महत्त्वाचा आधार समजले जाणाऱ्या पोलीस पाटलांची तब्बल ७४ पदे रिक्त असल्याने या गावाचा कारभार मागील तीन वर्षांपासून पोलीस पाटलांविनाच सुरू आहे.

जूनमध्ये भरणार पदे : ग्रामपंचायत निवडणूक पोलीस पाटलांविनाच
धामणगाव रेल्वे : शासनाचा शेवटच्या घटकांतील महत्त्वाचा आधार समजले जाणाऱ्या पोलीस पाटलांची तब्बल ७४ पदे रिक्त असल्याने या गावाचा कारभार मागील तीन वर्षांपासून पोलीस पाटलांविनाच सुरू आहे. परिणामी ‘गाव तंटामुक्त अभियाना’चा फज्जा उडाला आहे़ तर तीन्ही तालुक्यातील ग्रामपंचायत निवडणुका पोलीस पाटलांच्या मदतीशिवाय होत आहेत.
राज्य शासनाच्या महसूल विभागाने दोन तालुके मिळून एक उपविभाग एक वर्षापूर्वी राज्यात केला असला तरी चढाओढीच्या राजकीय स्थितीमुळे तीन तालुक्यांचा चांदूररेल्वे उपविभाग अस्तित्वात आला आहे़ तिवसा तालुका वगळून नांदगाव खंडेश्वर तालुका चांदूररेल्वे उपविभागाला जोडण्यात आला आहे़ आतापर्यंत लोकसभा, विधानसभा तसेच दोन तालुक्यातील पंचायत समिती निवडणुका पार पडल्या. परंतु आदर्श आचारसंहितेमुळे पोलीस पाटलांची पदे भरण्यात आली नाहीत.

नांदगावात ३४ गावांना पोलीस पाटलांची प्रतीक्षा
नव्याने चांदूररेल्वे उपविभागाला जोडण्यात आलेल्या नांदगाव खंडेश्वर तालुक्यातील ३४ गावे पोलीस पाटलापासून अनेक दिवसांपासून अलीप्त आहेत़ पहूर, गावनेर तळेगाव, दारापूर, सातरगाव, चांदसुरा, नागझिरी, टाकळी कानडा, धानोरा शिखरा, मोरगाव, जगतपूर, पिंपरी पोच्छा, वरूडा, पिंपळगाव बैनाई, ढेगांडा, रसुलपूर, हरनी, निमगव्हाण,फूल आमला, म्हसला, निरसाना, जामगाव, वाटपूर, कोहळा, सुकळी गुरव, वाघोली, शिंगोली, साखरा, पळसमंडळ, एकलारा बीड, माहुली चोर, सिध्दनाथपूर, धानोरा फसी, इंजाळा, पाचोड या गावांमध्ये अनेक दिवसांपासून पोलीस पाटलांची नियुक्ती करण्यात आलेली नाही. मात्र आता मागणी होत आहे.

धामणगावात २१ पदे रिक्त
पोलीस पाटलांची तब्बल २१ पदे धामणगाव तालुक्यात रिक्त आहे़ ही गावे पोलीस पाटलापासून वंचित आहे़ निंबोली, सोनोरा काकडे, निंभोरा बोडका, सावळा, गंगाजळी, परसोडी,शेंदूरजना खुर्द, वरूड बगाजी, जळका पटाचे, महिमा पूर, खरडा, बोरवघड, नायगाव, वाढोना, ढाकुलगाव, कामनापूर घुसळी, तुळजापूर सोनेगाव खर्डा, वसाड, आष्ट, कळाशी या गावात पोलीस पाटील पदे अनेक दिवसांपासून रिक्त आहेत.
चांदूररेल्वेत १८ गावांना
हवे पोलीस पाटील
चांदूररेल्वे तालुक्यातील एक वर्षापासून १८ गावे पोलीस पाटलांविना आहेत़ इस्माईलपूर, कळमगाव, ब्रम्ही, मांजरखेड कसबा, सोनगाव, हडप्पा, दिघ्घी कोल्हे, आमला, थूगाव, बग्गी, खानापूर, जवळा, खरबी माणिक धोत्रा, मांजरखेड दानापूर, सालोरा खुर्द, सावंगी मग्रापूर, धानोरा मोगल या गावांना पोलीस पाटील देणे अतिशय गरजेचे आहे़

चांदूररेल्वे उपविभागातील ७४ पोलीस पाटलांची पदे रिक्त आहेत. मध्यंतरी ही पदे भरण्यासाठी वरिष्ठ पातळीवर स्थगनादेश होता़ त्यानंतर प्रशासकीय कार्यवाही वेगाने झाली. परंतु लोकसभा, विधानसभा, पंचायत समिती या निवडणुका पाठोपाठ ग्रामपंचायतीच्या निवडणुका होत आहेत. आदर्श आचारसंहितेमुळे या गावांतील पोलीस पाटलांची पदे भरण्यात आलेली नाहीत़ याबाबत जिल्हा प्रशासनाला माहिती कळविण्यात आली आहे़ या गावांचा पदभार सध्या शेजारच्या गावांतील पोलीस पाटलांकडे देण्यात आला असल्यामुळे कायदा व सुव्यवस्था व्यवस्थितपणे सांभाळली जात आहे़
-नितीन व्यवहारे,
उपविभागीय अधिकारी,
महसूल विभाग, चांदूररेल्वे.