संत्रातोडीवर जाणाऱ्या ट्रकला अपघात

चौघे जखमी, जखमींमध्ये बालमजूरही

परतवाडा : संत्री तोडण्यासाठी जाणाऱ्या ट्रकला परतवाडा-चांदूर बाजार मार्गावर त्रिवेणी संगमालगतच्या पुलाजवळ झालेल्या अपघातात चार जण जखमी झाले. मंगळवारी हा अपघात घडला. यात तीन बालमजूर असून, त्यापैकी एकाची प्रकृती चिंताजनक असल्याची माहिती आहे.

पोलीस सूत्रांनुसार, चांदूर बाजारच्या दिशेने निघालेल्या एमएच २७ एक्स ८१३२ क्रमांकाच्या ट्रकमध्ये दहा ते पंधरा आदिवासी मजूर संत्री तोडण्यासाठी शिडी घेऊन जात होते. विरुद्ध दिशेने कापूस खाली करून घेत असलेल्या एमएच ०४ बीयू ८११६ क्रमांकाच्या वाहनाशी ट्रकची धडक झाली. यानंतर तो उलटला.

जखमींमध्ये अंकुश इवने, सीमा परते, रीता मांजरीवार या बालमजुरांसह शांता सलामे (५५) यांना उपचारार्थ उपजिल्हा रुग्णालयात अचलपूर येथे दाखल करण्यात आले. परतवाडा पोलीस घटनेची चौकशी करीत आहेत.