अचलपूर नगरपालिका क्षेत्रात तेरा वर्षांपासून कर आकारणीच नाही.

परतवाडा : १३ वर्षांपासून अचलपूर नगरपालिका क्षेत्रातील बांधकाम पूर्ण झालेल्या अनेक नव्या इमारतींचे असेसमेंट करून त्यावर नगरपरिषदेकडून कराची आकारणी करण्यात आलेली नाही.

लोक त्या इमारतींमध्ये मागील अनेक वर्षांपासून राहात आहेत. या इमारती वापरात आहेत. असे असूनही या इमारतींवर कर आकारण्यात न आल्यामुळे नगरपालिकेचे मोठ्या प्रमाणात आर्थिक नुकसान होत आहे.

दरम्यान, कर विभागात नागरिकांच्या हजारो फाईल या अनुषंगाने धूळ खात पडल्या आहेत. अशी तक्रार रिपब्लिकन पार्टी ऑफ इंडिया अचलपूर शहरचे अध्यक्ष किशोर मोहोड यांनी अचलपूर नगरपालिकेच्या मुख्याधिकाऱ्यांकडे केली आहे.

२००९ ते २०२१ पर्यंत नगरपालिकेने त्या इमारतींच्या बांधकामाचे असेसमेंट केलेले नाही. त्यावर कर आकारला नाही. यात दवाखान्याचे बांधकाम, उद्योग संबंधित बांधकाम तसेच भव्य दिव्य इमारतीच्या बांधकामाचा समावेश असल्याचे तक्रारीत नमूद आहे.

ज्या नागरिकांचे वास्तव्य नझुलच्या जागेवर आहे अशा घरांना कर लावण्यात यावा. घरकुल योजना, रमाई आवास योजना आणि प्रधानमंत्री आवास योजनेतून पूर्ण बांधकाम झालेल्या घरकुलांनाही कर लावण्यात यावा. अनेकांकडे कराची पावती नसल्यामुळे त्यांना शासकीय योजनांच्या लाभापासून वंचित रहावे लागत आहे. पीआर कार्ड मिळविण्यातही नागरिकांना अडचणी येत असल्याचे किशोर मोहोड यांचे म्हणणे आहे.

नगरपालिकेने कराची आकारणी करावी. नगरपालिकेचे होत असलेले आर्थिक नुकसान थांबवावे. संबंधितांना कराची पावती द्यावी. अन्यथा रिपब्लिकन पार्टी ऑफ इंडिया अचलपूर शहराच्यावतीने उग्र आंदोलन करण्यात येणार असल्याचा इशाराही मोहोड यांनी आपल्या निवेदनातून मुख्याधिकार्‍यांना दिला आहे.

दि 14/6/21 / फोटो नगरपालिकेचा