परतवाड्याच्या कुख्यात गुंडाविरूध्द एमपीडीएद्वारे कारवाई

अमरावती: परतवाडा येथील कुख्यात गुंड पवन उर्फ पैदल शिशुपाल परिवाले (२९, कांडली) याच्याविरूध्द एमपीडीए अन्वये कारवाई करून त्याला एक वर्षांकरिता जिल्हा मध्यवर्ती कारागृहात स्थानबध्द करण्यात आले. १ मार्च रोजी ‘पैदल’ ला पकडून जेलमध्ये टाकण्याची कार्यवाही करण्यात आली.

आरोपी पैदल परिवालेविरूध्द खून, दंगा व अन्य गंभीर गुन्हे दाखल आहेत. त्याच्यावर यापुर्वी देखील तडीपारी व स्थानबध्दतेची कार्यवाही करण्यात आली. मात्र कारागृहातून बाहेर पडल्यानंतरही त्याने गुन्हेगारी कारवाया सुरूच ठेवल्या. त्यामुळे त्याला पुन्हा एकदा स्थानबध्द करण्याचा प्रस्ताव पोलीस अधीक्षक अविनाश बारगळ यांनी जिल्हा दंडाधिकाऱ्यांकडे पाठविला. त्याला हिरवी झेंडी मिळाल्यानंतर तो आदेश १ मार्च रोजी तामिल करण्यात आला. ही कार्यवाही पुर्ण करण्यासाठी एसपी बारगळ, अपर पोलीस अधीक्षक शशीकांत सातव, स्थानिक गुन्हे शाखेचे निरिक्षक तपन कोल्हे यांच्या मार्गदर्शनात उपनिरिक्षक आशिष शिंदे, अंमलदार अमोल देशमुख, अमित वानखडे यांच्यासह परतवाड्याचे ठाणेदार संदीप चव्हान यांनी परिश्रम घेतले.