अमरावतीत पोलीस उपनिरीक्षकाची आत्महत्या

फोटो पी १३ मुळे

अमरावती : शहर पोलीस आयुक्तालयातील फ्रेजरपुरा ठाण्यात कार्यरत पोलीस उपनिरीक्षक अनिल बंडाप्पा मुळे (३२) यांनी शुक्रवारी गळफास घेऊन आत्महत्या केली. शुक्रवारी सायंकाळी ५ ते ५.३० च्या सुमारास रिंग रोडवरील एका झाडाला ते गळफास घेतलेल्या अवस्थेत दिसून आले. नांदगाव पेठ पोलीस घटनास्थळी पोहोचले असून, वृत्त लिहिस्तोवर आत्महत्येमागील कारण स्पष्ट होऊ शकले नाही.

आठ ते नऊ महिन्यांपूर्वी अनिल मुळे यांची गाडगेनगर ठाण्यातून फ्रेजरपुरा पोलीस ठाण्यात बदली झाली होती. मूळचे नांदेड जिल्ह्यातील रहिवासी असलेले मुळे हे मागील सात महिन्यांपासून आजारी रजेवर होते. ते येथे पत्नी व दोन मुलांसमवेत राहत होते. यादरम्यान शुक्रवारी एक व्यक्ती गळफास घेतलेल्या अवस्थेत असल्याची माहिती नांदगाव पेठ पोलिसांना देण्यात आली. घटनास्थळी पोलीस आयुक्त डॉ. आरती सिंह यांनी भेट दिली, तर नांदगावपेठचे ठाणेदार गोरखनाथ गांगुर्डे पथकासह घटनास्थळी पोहोचले होते. अनिल मुळे हे कठोरा नाका, रिंग रोड परिसरात वास्तव्यास होते. त्यांच्या राहत्या घरापासून जवळ असलेल्या गोल्डन लिफ मंगल कार्यालयासमोरील लेआऊटमधील निंबाच्या झाडाला गळफास घेऊन त्यांनी जीवनयात्रा संपविली.