अंजनवात डिझेल चोरट्यांना रंगेहाथ पकडले

शहरातील अय्याज खान बिल्डिंग मटेरिअल सप्लायर कंपनीची ट्रक व इतर वाहने अकोट मार्गावरील त्यांच्या केजीएन वजनकाट्यामागील जागेत उभी असतात. एक महिन्यापासून यांच्या बऱ्याच वाहनांतून डिझेल चोरीला जात असल्याचे त्यांच्या लक्षात आले; पण डिझेल नेमके कोण चोरत असेल याचा सोक्षमोक्ष लावण्याकरिता अय्याज खान यांनी मंगळवारी रात्री सहकाऱ्यांसोबत सापळा रचला व रात्री तीन वाजता ट्रक क्रमांक एम एच ३५/१४३६ या गाडीतून राजिक शाह, जिया परवेज व साबिर कुरेशी या तिघांना डिझेल चोरताना रंगेहात पकडून अंजनगाव पोलिसांच्या ताब्यात दिले. फिर्यादी अय्याज खान युनिस खान यांच्या तक्रारीवरून आरोपी राजिक शाह, जिया परवेज व साबिर कुरेशी (तिघेही रा. सुर्जी अंजनगाव) विरुद्ध भादंविचे कलम ३७९/३४ अन्वये गुन्हा नोंदविण्यात आला. आरोपींना अंजनगाव सुर्जी न्यायालयात दाखल करण्यात आले.