मेळघाटातील दुसराही मृत लांडगा रेबीज पॉझिटिव्ह, अहवालातून स्पष्ट

मेळघाटातील मत दुसऱ्या लांडग्याचा प्रयोगशाळेतील अहवालही रेबीज पॉझिटिव्ह आला आहे. या अहवालानंतर वनविभाग आणि व्याघ्र प्रकल्पात खळबळ उडाली आहे.

ठळक मुद्देबंगळूरू प्रयोगशाळेचा अहवालजंगलात १४ ट्रॅप कॅमेरे

नरेंद्र जावरे-

अमरावती : धारणी तालुक्यात आठ जणांना चावा घेणाऱ्या दुसऱ्या मृत लांडग्याचा प्रयोगशाळेचा अहवालसुद्धा रेबीज झाल्याचा आला आहे. त्यामुळे मेळघाट व्याघ्र प्रकल्प व वन विभागाने सतर्कतेचे आदेश देण्यात आले आहेत. यासंदर्भात लोकमतने पूर्वीच शक्यता वर्तविली होती. ती तंतोतंत खरी ठरली. चवताळलेला लांडगा वजा इतर प्राणी शोधण्याची युद्धस्तरावर मोहीम राबविली जात आहे. जंगलात १४ कॅमेरा ट्रॅप लावण्यात आले आहे.

मेळघाटच्या धारणी तालुक्यातील चिपोली येथे २७ आदिवासी नागरिकांना चावा घेणाऱ्या लांडग्याला संतप्त नागरिकांच्या जमावाने ठार मारले होते. त्याला रेबीज झाल्याचा अहवाल बंगळुरु येथील प्रयोगशाळेतून आला होता. त्यानंतर पुन्हा शनिवारी धारणी व परिसरात चवताळलेल्या लांडग्याने आठ नागरिकांना चावा घेतला. वन विभागाने शोधमोहीम राबविली. दुसऱ्या दिवशी तो लांडगा जुटपाणी गावानजीक मृतावस्थेत आढळला. त्याचा शवविच्छेदन अहवाल बंगळूरु येथील प्रयोगशाळेतून प्राप्त झाला असून, त्याला रेबीज झाल्याचे धूळघाट रेल्वे वनपरिक्षेत्र अधिकारी शुभांगी डेहनकर यांनी लोकमतशी बोलताना सांगितले. या अहवालानंतर वनविभाग आणि व्याघ्र प्रकल्पात खळबळ उडाली आहे.

गावातील कुत्री, पाणवठे तपासणी

लांडग्यांना रेबीज झाल्यामुळे व्याघ्र प्रकल्पातील वाघ व बिबट इतर वन्य प्राण्यांना चवताळलेल्या प्राण्यांचा कुठलीही इजा होऊ नये. रेबीज त्यांच्यापर्यंत जाऊ नये. यासाठी सिपना व गुगामल वन्यजीव विभागात अतिदक्षतेचा आदेश देण्यात आले आहे. गावातील चवताळलेली कुत्री जनजागृती यावर सर्वत्र आदेश दिल्याचे सिपना वन्यजीव विभागाचे सहायक वनसंरक्षक कमलेश पाटील यांनी सांगितले. सर्व उपाययोजना व पाणवठेसुद्धा लिटमस पेपरने तपासले जात असल्याचे गुगामलचे सहायक वनसंरक्षक मच्छिंद्र ठिगळे यांनी सांगितले.

आठ टीम, २४ तास गस्त

धारणी व परिसरातील वन विभागाच्या जंगलात आठ चमूकडून सहा तासाच्या गस्ती घातल्या जात आहेत. आदिवासी गावकऱ्यांमध्ये, कॅम्पेनिंग, कॉल आल्यावर त्वरित कारवाई करून शोधमोहीम सुरू आहे.

दुसऱ्या लांडग्याचा प्रयोगशाळेतील अहवाल रेबीज पॉझिटिव्ह आला आहे. आठ चमूकडून प्रत्येकी सहा तास रात्रंदिवस गस्त सुरू आहे. १४ ट्रॅप कॅमेरे जंगलात लावलेले आहेत.

- शुभांगी डेहनकर, वनपरिक्षेत्र अधिकारी, सुसर्दा/ धूळघात रेल्वे, ता. धारणी.