लग्नाचे आमिष दाखवून महिलेवर अत्याचार

अमरावती : विवाहित पुरुषाने एका ३० वर्षीय महिलेला लग्नाचे आमिष दाखवून लैंगिक अत्याचार केला आणि तिच्याशी लग्न करून घरातून हाकलून लावले. ही धक्कादायक घटना गाडगेनगर हद्दीतील शोभानगरात गुरुवारी उघडकीस आली.

याप्रकरणात पोलिसांनी आरोपी निशांत नानासाहेब वानखडे (रा. गुलाबबाबा कॉलनी) याला अटक केली. ३० वर्षीय महिलेची निशांत वानखडेसोबत ओळख झाल्यानंतर त्याने महिलेला लग्नाचे आमिष दाखविले. तिच्याशी वारंवार शारीरिक संबंध प्रस्थापित केले. दरम्यान निशांतने महिलेशी लग्नही केले. परंतु लग्नानंतर महिलेला समजले की, निशांतचे यापूर्वी लग्न झाले आहे. त्यावेळी तिने निशांतला लग्नाबद्दल विचारपूस केली असता, त्याने उडवाउडवीची उत्तरे दिली. तिला घरातून हाकलून दिले. त्यामुळे महिलेने निशांतच्या आई-वडिलांना माहिती दिली. परंतु त्यांनी सुध्दा महिलेला घरातून हाकलून दिले. त्यानंतरही २६ एप्रिल रोजी महिला तिच्या आईच्या घरात असताना निशांतने पुन्हा महिलेच्या इच्छेविरुध्द जबरदस्तीने लैंगिक अत्याचार केला. महिलेच्या आईला मारण्याची धमकी देऊन पीडित महिलेलाही धमकाविले. तक्रारीवरून गाडगेनगर पोलिसांनी आरोपी निशांत वानखडेविरुध्द भादंविचे कलम ३७६, ३७६(२)(एन)३२३, ४५२, ५०४, ५०६ अन्वये गुन्हा नोंदविला. पुढील तपास वरिष्ठ पोलीस निरीक्षक आसाराम चोरमले करीत आहेत.