पोलिसांना मारहाण, वाहनावर दगडफेक; एपीआयवर उगारला चाकू

चांगापूर फाट्याजवळची घटना : आरोपींच्या पाठीराख्यांचा प्रताप, तिघांना अटक

अमरावती : पोस्को व विनयभंगाच्या गुन्ह्यातील आरोपीला घेऊन ठाण्यााकडे येत असलेल्या गाडगेनगर पोलिसांशी वाद घालून त्यांना मारहाण करण्यात आली. तर, पैकी एकाने पोलीस निरीक्षकावर चाकू उगारला. प्रसंगावधान राखून तो वार चुकविण्यात आला. हल्लेखोरांनी पोलिसांच्या वाहनावर दगडफेक केली. ही खळबळजनक घटना २९ डिसेंबर रोजी रात्री चांगापूर फाट्यावर घडली. आरोपीच्या पाठीराख्यांनी हा प्रताप केला. या हल्ल्यात सहायक पोलीस निरिक्षक, उपनिरीक्षकांसह तीन पोलिस अंमलदार जखमी झाले आहेत.

गाडगेनगर पोलिसांनी याप्रकरणी चेतन कोटेचा, सौरभ वानखडे, सैय्यद इमरान अली मुमताज अली, सैय्यद इरफान अली मुमताज अली, सचिन घोंगडे (रा. महेन्द्र कॉलनी), श्रीकांत सावळीकर (३०, रा. वलगाव) यांच्यासह दहा ते बारा जणांविरुध्द गुन्हा दाखल केला. पैकी तिघांना अटक करण्यात आली. गाडगेनगर ठाण्यात २३ डिसेंबर २०२२ रोजी एका अल्पवयीन मुलीच्या तक्रारीवरुन अनोळखी मुलाविरुध्द गुन्हा दाखल झाला.

दरम्यान गुरूवारी सांयकाळी सैय्यद इमरान अली मुमताज अली हा या प्रकरणातील आरोपी असल्याचे तपासात निष्पन्न झाले. त्यामुळे गाडगेनगरचे पोलीस उपनिरिक्षक पंकज ढोके, सहायक पोलीस निरिक्षक महेश इंगोले, हेड कॉन्स्टेबल ईशय खांडे, गजानन बरडे आणि आस्तिक देशमुख हे पथक गुरूवारी रात्री आरोपीच्या शोधात निघाले. दरम्यान तो वलगाव येथील एका रिसोर्ट येथे असल्याची माहिती मिळताच पोलिसांनी गुरूवारी रात्री ते रिसोर्ट गाठले. यावेळी सर्व पोलीस साध्या गणवेषात व खासगी वाहनाने गेले होते. त्यांनी सिकची रिसोर्टवरुन सैय्यद इमरान अलीला ताब्यात घेतले आणि ते ठाण्याकडे निघाले.

अशी घडली घटना

गाडगेनगर पोलिसांनुसार, गुरूवारी रात्री १२ च्या सुमारास चांगापूर फाट्याजवळ एक चारचाकी वाहन पोलिसांच्या वाहनासमोर आले. त्यांनी पोलिस वाहन थांबवले. त्यावेळी दहा ते बारा जण पोलिसांसमोर उभे ठाकले. कोटेचा व अन्य व्यक्तींनी मोबाईलमध्ये शुटींग केले. तुम्ही त्याला कसे घेवून निघाले, तुमच्याकडे वॉरंट आहे का? अशी विचारणा करत पोलिसांच्या खासगी वाहनाची चाबी काढून घेतली. त्यानंतर त्यांनी आरोपीला सोडविण्याचा प्रयत्न केला. यावेळी आरोपी काही दूर पळाला मात्र पोलिसांनी त्याला पकडले. यावेळी पोलिस व आरोपीला सोडवायला आलेल्या व्यक्तींमध्ये जोरदार वाद झाला. त्यावेळी चेतन कोटेचा व ईतरांनी एपीआय इंगोले व इतर पोलिसांना मारहाण सुरू केली.

अतिरिक्त कुमक मागविली

तेथे अतिरिक्त पोलिस ताफा बोलावण्यात आला. तो ताफा दिसताच हल्लेखोर घटनास्थळावरुन पळत होते. त्याचवेळी हल्ला परतवून लावण्यासाठी पोलिस कारच्या मागे असता कारवर दगडफेक केली. त्यानंतर सैय्यद इमरान अली याच्यासह श्रीकांत सावळीकर आणि सचिन घोंगडे यांना अटक केली. या प्रकरणी पीएसआय ढोके यांच्या तक्रारीवरुन पोलिसांनी सर्व आरोपींविरुध्द शासकिय कामात अडथळा निर्माण करणे, मारहाण करणे, दंगा करणे यासह अन्य कलमान्वये गुन्हा दाखल केला आहे.

खासगी वाहन कसे?

परजिल्ह्यात वा परप्रांतातून आरोपीला आणायचे असल्यास खासगी वाहन घेतले जाते. मात्र, येथे हद्दीनजिकच्या ठिकाणी आरोपी असल्याची पक्की खबर असताना त्याला आणण्यासाठी खासगी वाहन का घेतले गेले, त्याबाबत स्टेशन डायरीवर नोंद घेण्यात आली का, असे प्रश्न उपस्थित झाले आहेत. त्यामुळे संशयकल्लोळ निर्माण झाला असताना एका पोलीस अंमलदाराच्या ‘हावरट’पणामुळे कालचा बाका प्रसंग उद्भवल्याची चर्चा झडत आहे.