अपघातग्रस्त ट्रेलरवर मागून धडकले भरधाव पिकअप वाहन

फोटो - ०२एएमपीएच०२ - अपघातग्रस्त पिकअप वाहन

तिवसा (अमरावाती) : संगमनेर (जि. अहमदनगर) तालुक्यातून अमरावतीमार्गे नागपूरकडे फुलांचे कॅरेट घेऊन जाणारे भरधाव पिकअप वाहन अपघातग्रस्त ट्रेलरवर धडकून झालेल्या भीषण अपघातात पिकअप चालक गंभीर जखमी झाला आहे. राष्ट्रीय महामार्गावरील मोझरीजवळ असलेल्या साईकृपा ढाब्यासमोर २ सप्टेंबर रोजी पहाटे ६ वाजताच्या सुमारास ही घटना घडली.

राजू ज्ञानेश्वर वाघ (३०, रा. आलापूर, ता. संगमनेर) असे अपघातात गंभीर जखमी झालेल्या चालकाचे नाव आहे. तो संगमनेर तालुक्यातून नागपूरकडे पिकअप (एमएच १४ एचजी ९८२३) वाहनात झेंडूच्या फुलांचे कॅरेट घेऊन जात होता. यादरम्यान राष्ट्रीय महामार्गावरील मोझरीनजीक असलेल्या साईकृपा ढाब्यासमोरील डिव्हायडर रात्रीच एमएच ३४ एबी ४८२९ क्रमांकाचा ट्रेलर चढून फसला होता. पहाटे पिकअप वाहन हे थेट त्या अपघातग्रस्त ट्रेलरवर मागून धडकले. केबिनमध्ये चालक राजू वाघ हा अक्षरशः फसला होता. महामार्गावर काम करीत असलेले सागर रावणकर, प्रदीप चक्रे,अमोल खारोडे आदी कामगारांनी घटनास्थळी धाव घेऊन त्याला बाहेर काढले.व रुग्णवाहिकेच्या मदतीने जिल्हा सामान्य रुग्णालयात उपचारार्थ रवाना केले. अपघाताची माहिती तिवसा पोलिसांना मिळताच सहायक निरीक्षक भारती व कर्मचाऱ्यांनी पाचारण करून घटनेचा पंचनामा केला.