भररस्त्यावरचा खून रोखला... झाडावर शस्त्रक्रिया करून जीव वाचविला !

फोटो - ०३एएमपीएच०१ कॅप्शन सप्तपर्णीच्या झाडाला अशाप्रकारे तोडण्यात आले.

०३एएमपीएच०२ - परिसरात नागरिक एकवटले व झाडाला उभे केले.

०३एएमपीएच०३ - झाडावर शस्त्रक्रिया करताना वनस्पती शास्त्र विषयाचे प्राध्यापक

गजानन चोपडे

अमरावती : ते पाच सहा वर्षांचे लेकरू रस्त्यावर गुमान होते. कुणाला काही त्रास नव्हता. उलट, त्याच्यामुळेच इतरांना सावलीचा आसरा होता. पण, एका क्रूरकर्म्याच्या मनात काळेबेरे आलेच. त्याने भर दुपारी त्याच्यावर कुऱ्हाडीचे घाव घातले. भररस्त्यावर होत असलेला हा खून पाहून काही जणांचे हृदय द्रवले. साऱ्या संवेदनशील माणसांनी ताकद एकवटून मारेकऱ्याचा सामना केला... अन् त्या निरागस जीवाला शेवटच्या क्षणी वाचविले... मृत्यूव्या कराल दाढेतून परत आलेला हा जीव म्हणजे सप्तपर्णीचे एक झाड होय!

हे झाड तुटण्यापासून लोकांनी रोखले, अर्धवट तुटलेल्या झाडावर शास्त्रशुद्ध शस्त्रक्रिया करून त्याला पुन्हा जोडले... ही हृदयद्रावक अन् तेवढीच प्रबोधनात्मक घटना घडली अमरावती शहरातील कठोरा मार्गावर...

पूर्वी चार जण मिळून झाड कापून काढत होते... कुणी साधी दखलही घेत नव्हते. पण आता चित्र पालटले आहे. चार-चौघांनी मिळून एका झाडाला जीवदान दिले. जागतिक पर्यावरण दिनाच्या पार्श्वभूमीवर घडलेला हा थरार दिलासादायकच...

कठोरा मार्गावरील नागरिक आपल्या परिवारासह ‘वृक्ष पालकत्व अभियानांतर्गत’ वृक्ष जगविण्यासाठी रणरणत्या उन्हात तन-मन-धनाने प्रयत्न करीत आहेत. दरम्यान, नारायण ट्रेडर्स या दुकानाच्या मालकाने बुधवारी आपल्या माणसांकरवी कुऱ्हाडीने घणाघाती घाव मारून डौलदार पणे उभ्या असलेल्या वृक्षाला कु-हाडीचे घाव घालून पाडले. हे दृश्य बघून सर्व वृक्ष पालकांचे हृदय पिळवटले. संताप अनावर झाला. ज्या वृक्षाला आपण कुटुंबातील सदस्याप्रमाणे जोपासले त्याचा असा अंत व्हावा, हे कुणालाही मान्य नव्हते.

वृक्ष पालकत्व अभियानाची धुरा सांभाळणाऱ्या अमरावती गार्डन क्लबने घटनास्थळीच ठिय्या देऊन याप्रकरणी दोषीवर कारवाईची मागणी महापालिका व पोलीस प्रशासनाकडे लावून धरली. अखेर रात्री उशिरा अमरावती गार्डन क्लबचे अध्यक्ष डॉ. दिनेश खेडकर यांच्या तक्रारीवरून वृक्षतोडीचा गंभीर गुन्हा या प्रकरणात गाडगेनगर पोलीस ठाण्यात दाखल झाला. या संपूर्ण प्रक्रियेत अमरावती गार्डन क्लबचे डॉ. दिनेश खेडकर, सुभाष भावे, डॉ. शशांक देशमुख, डॉ. रेखा मग्गीरवार, डॉ. गणेश हेडावू, डॉ. उमेश कन्हेरकर, डॉ. सुचिता खोडके, सुरेश राऊत, मिलिंद तट्टे, दिलीप नंदागवळी, अशोक हांडे, डॉ. चंदनसिंह राजपूत, अतिश पाटेकर, मंगेश अडगोकर, रामेश्वर चरपे, नीलिमा विखे, क्षीप्रा मानकर आदी सहभागी होते.

बॉक्स

झाडावर शास्त्रशुद्ध शस्त्रक्रिया

झाडाची कत्तल सुरू असताना प्रत्यक्षदर्शीने फोटो काढताच झाड तोडणाऱ्याने धूम ठोकली. त्यामुळे झाडाचा शेवटचा अगदी थोडा भाग जुळलेला होता. अशा परिस्थितीत गार्डन क्लबचे तज्ञ आणि वनस्पतीशास्त्र विषयाचे प्राध्यापक या सर्वांनी मिळून या वृक्षाला वाचविण्यासाठी “ऑपरेशन रीव्हायवल” हा अभिनव प्रयोग प्रयत्न केला. यामध्ये त्याच वृक्षाच्या फांद्या कापून तुटलेला भाग जोडण्यासाठी बांधण्यात देऊन, मॉसचे आवरण आणि होर्मोनची ट्रीटमेंट केली आहे. या कामात मंगेश वेलकर यांनी महत्त्वपूर्ण योगदान दिले.

कोट

वृक्ष संवर्धन मोहिमेंतर्गत अनेक नागरिक जुळले आणि त्यांनी वृक्षलागवड करून त्या वृक्षाचे जतन केले असे असताना त्याची कत्तल होणे म्हणजे एक गंभीर गुन्हा होय. अशा लोकांना कठोर शिक्षा करणारा कायदा अस्तित्वात यायला पाहिजे. तरच या कारवायांवर निर्बंध घालता येईल.

- डॉ दिनेश खेडकर, अध्यक्ष, अमरावती गार्डन क्लब