मध्यवर्ती कारागृह झाले कोराेनामुक्त

अमरावती : येथील मध्यवर्ती कारागृह कोराेना संक्रमणापासून मुक्त झाले आहे. आजमितीला एकही कैदी पॉझिटिव्ह नसल्याची नोंद करण्यात आली आहे. गत आठवड्यात दोन कैदी कोरोना संक्रमित होते, पण आता तेसुद्धा निगेटिव्ह आहेत. कोरोना नियमावलींचे कठोर पालन केल्यामुळे कारागृह कोरोनामुक्त झाले आहे.

कोरोना संसर्गाची साखळी तोडण्यासाठी जिल्ह्यात ३१ मेपर्यंत कठोर संचारबंदी लागू आहे. कोरोना संक्रमित रुग्ण, मृत्युसंख्या दरदिवशी वाढत आहे. मात्र, येथील मध्यवर्ती कारागृहाने कोरोना नियमावलींचे काटेकोर पालन करून कोरोना नियंत्रणात आणला आहे. हल्ली कारागृहात एकही कैदी संक्रमित नाही. होमगार्डच्या विभागीय कार्यालयात आयसोलेटेड कैदीसुद्धा नाहीत.

मध्यवर्ती कारागृहात महिला व पुरुष असे ११५० च्यावर कैदी बंदिस्त आहेत. कोरोनाच्या पहिल्या लाटेत कारागृहातील ६८ कैदी व कर्मचाऱ्यांना कोरोनाने ग्रासले होते. मात्र, एप्रिलपासून कोरोनाची दुसरी लाट सुरू झाली असताना, कारागृहात कोरोना नियंत्रणात आणला आहे. कैद्यांची नियमित आरोग्य तपासणी, मास्कचा वापर, शारीरिक सुरक्षित अंतर आदी नियमांचे काटेकोर पालन करण्यात आले आहे. त्यामुळे आजमितीला ११५० कैदी संख्या असताना एकही कैदी कोरोना संक्रमित नाही, ही बाब जमेची ठरणारी आहे. पहिल्या लाटेत एक कर्मचारी व एक कैदी कोरोनाचा बळी ठरला होता. त्यानंतर कारागृहात कोरोना नियमांचे तंतोतंत पालन करण्यात येत आहे. नियमित आरोग्य तपासणीदरम्यान ताप, खोकला, सर्दीचे रुग्ण आढळल्यास औषधोपचार केला जातो. होमगार्ड कार्यालयात साकारण्यात आलेल्या कोविड केअर केंद्रात संक्रमित कैद्यांवर उपचार होत असल्याची माहिती वैद्यकीय आरोग्य अधिकारी एस.आय. थोरात यांनी दिली.

------------------

नवीन कैदी १४ दिवस क्वारंटाईन

न्यायालयाच्या आदेशानुसार, कारागृहात पाठविल्या जाणाऱ्या प्रत्येक नवीन कैद्याला तात्पुरत्या कारागृहात १४ दिवस क्वारंटाईन नियमावली अनिवार्य आहे. त्यामुळे थेट कारागृहात नवीन कैद्यांची कोरोना चाचणी झाल्याशिवाय प्रवेश दिला जात नाही तसेच नियमित आरोग्य तपासणीमुळेसुद्धा कैदी कोरोना संसर्गापासून लांब राहत असल्याचे वास्तव आहे.

---------------

गत आठवड्यात ३० कैद्यांची आकस्मिक ॲन्टिजेन चाचणी केली असता, एकही संक्रमित आढळून आले नाही. कठाेर नियमांचे पालन हेच कारागृहातील कोरोनामुक्तीसाठी लाभदायक ठरले आहे.

- रमेश कांबळे, अधीक्षक, मध्यवर्ती कारागृह, अमरावती.