‘शिवाजी’च्या विजयी जल्लोषात देवेंद्र भुयारांचा भन्नाट डान्स

ढोल-ताशांवर तासभर नृत्य, गुलालाची उधळण, समर्थकांनी आमदारांना खांद्यावर घेऊन साजरा केला आनंदोत्सव

अमरावती : येथील श्री शिवाजी शिक्षण संस्थेची निवडणूक रविवारी पार पडली. या निवडणुकीत प्रगती पॅनलने दमदार विजय मिळविला. पुन्हा अध्यक्षपदी हर्षवर्धन देशमुख हे असणार आहेत. मात्र, हर्षवर्धन देशमुख हे विजयी झाल्याच्या पार्श्वभूमीवर मोर्शी-वरूडचे आमदार देवेंद्र भुयार यांनी भन्नाट डान्स केला. मतदान केंद्रावर रविवारी रात्री तासभर चाललेल्या या डान्सचा व्हिडीओ सोशल मीडियावर चांगलाच व्हायरल झाला आहे.

यंदा शिवाजी शिक्षण संस्थेची निवडणूक वादग्रस्त ठरली. रविवार, ११ सप्टेंबर रोजी शिवाजी बीपीएड महाविद्यालयातील मतदान केंद्रात बोगस मतदान आणि प्रचार करीत असल्याच्या कारणावरून हर्षवर्धन देशमुख आणि नरेशचंद्र ठाकरे यांचे समर्थक आमने-सामने आले होते. मोठा राडादेखील झाला. हाणामारी झाली. पोलिसांनी सौम्य लाठीमार करून परिस्थिती नियंत्रणात आणली. मात्र, हर्षवर्धन देशमुख यांचे खंदे समर्थक असलेले आमदार देवेंद्र भुयार हे रविवारी मतदान केंद्रावर सकाळी ९ वाजतापासून तर मध्यरात्रीपर्यंत तळ ठोकून होते. एवढेच नव्हे तर आमदार भुयार हे हर्षवर्धन देशमुख यांचे निवडणूक प्रतिनिधी म्हणून त्यांनी महत्त्वपूर्ण भूमिका बजावली. 

तथापि, प्रगती पॅनलचे उमेदवार विजयी होत असल्याचे निकाल जाहीर होताना आमदार भुयार यांच्या चेहऱ्यावर आनंद ओसंडून वाहत होता. मात्र, हर्षवर्धन देशमुख यांनी अध्यक्षपदाची निवडणूक जिंकली हे जाहीर होताच ‘लाव रे ढाेल-ताशे’ असा जोराचा आवाज आमदार भुयार यांनी दिला. त्यानंतर गुलालाची उधळण आणि विजयी जल्लोषात देवेंद्र भुयारांचा भन्नाट डान्स अनेकांनी कॅमेऱ्यात कैद केला. गुलालाने माखलेल्या आमदार देवेंद्र भुयार यांनी कार्यकर्त्यांच्या खांद्यावर बसून भन्नाट डान्स केला. या उत्साहाच्या भरात केलेला डान्स सध्या समाज माध्यमांवर चांगला चर्चिला जात आहे. आमदार देवेंद्र भुयार हे गत महिन्यात २१ ऑगस्ट महिन्यातच लग्नबंधनात अडकले, हे विशेष.