तिवसा बसस्थानकातून डिझेल चोरी

बाहेरच्या पानासाठी

सीसीटीव्हीमध्ये कैद : सुरक्षारक्षक झोपेत, चोर पळण्यात यशस्वी

तिवसा : येथील बसस्थानकातून गुरुवारी रात्री २ वाजताच्या सुमारास बस स्थानकात उभ्या असलेल्या बसमधून ६०० लिटर डिझेल चोरी गेले. शुक्रवारी सकाळी ही घटना सकाळी उघड झाली. बसस्थानकातील सीसीटीव्ही कॅमेऱ्यात चोराच्या हालचाली कैद झाल्या आहेत. तिवसा पोलिसांनी घटनास्थळी पोहचून पंचनामा केला. तथा चोराविरुद्ध गुन्हा दाखल केला आहे.

सध्या सर्वत्र थंडीचा जोर वाढत असून शहरातील रस्ते रात्री ९ वाजताच सामसूम होत आहेत. याचा फायदा घेत भुरट्या चोरांसह अट्टल चोर सरसावले आहेत. त्यांनी गुरुवारी तिवसा बस स्थानकाला लक्ष्य करीत उभ्या बसमधून डिझेल चोरून नेले. सीसीटीव्ही फुटेज व आगार व्यवस्थापकांच्या म्हणण्यानुसार, गुरुवारी मध्यरात्री २ च्या सुमारास तीन चोर चारचाकी वाहनाने बस स्थानकात शिरले. ते तेथील चार बसमधून ४६ हजार ३११ रुपयांचे सहाशे लिटर डिझेल चोरी करून पसार झाले. बसस्थानकातील सुरक्षारक्षक झोपेत असल्याने चोर पळून जाण्यात यशस्वी ठरले.