दारुच्या नशेत पोलिसाचा एसटी बसमध्ये धिंगाणा, निलंबनाची कारवाई

अक्षय बेलसरे ग्रामीण पोलिस दलात असून तो सध्या पोलीस मुख्यालयात कार्यरत होता

अमरावती : दर्यापूर ते अमरावती बसमध्ये धिंगाणा घालणाऱ्या एका पोलिसाला तडकाफडकी निलंबित करण्यात आले आहे. शुक्रवारी दुपारी ही घटना घडली होती. त्याप्रकरणाचा अहवाल येताच त्याचेवर शनिवारी निलंबनाची कारवाई करण्यात आली. अक्षय बेलसरे असे निलंबित पोलीस अंमलदाराचे नाव आहे.

अक्षय बेलसरे ग्रामीण पोलिस दलात असून तो सध्या पोलीस मुख्यालयात कार्यरत होता. शुक्रवारी गणवेष घालून बेलसरे खोलापूर बसस्थानकाहून एसटी बसमध्ये चढला. बस धावू लागल्यानंतर त्याने दारुच्या नशेतच बसमधील वाहक, प्रवाशांकडे पाहत, हातवारे करुन अश्लील शिवीगाळ सुरू केली. त्याला समजावण्याचा प्रयत्न करणाऱ्यालाही तो शिवीगाळ करत होता. अखेर बस चालकाने प्रवाशांसह बस खोलापूर पोलीस ठाण्यात आणली व अक्षय बेलसरेला पोलिसांच्या स्वाधिन केले. त्यानंतर बस पुढील प्रवासाला निघाली. दरम्यान खोलापूरचे ठाणेदार संघरक्षक भगत यांनी तत्काळ या पोलिसांविरुध्द प्रतिबंधात्मक कारवाई करुन त्याच्या शरीरातील रक्ताचे नमुने तपासणीसाठी पाठवले आहे. या प्रकाराचा एक व्हिडिओसुध्दा सोशल मिडियावर व्हायरल झाला आहे. या प्रकरणाची दखल घेवून पोलिस अधीक्षक अविनाश बारगळ यांनी अक्षय बेलसरेला निलंबित केले आहे.