अचलपूर तालुक्यातील तीन ग्रामपंचायतींच्या सरपंचपदाची निवड

परतवाडा : अचलपूर तालुक्यातील ग्रामपंचायतीच्या सरपंचपदाची निवडणूक शुक्रवारी पार पडली. त्यात वडनेर भूजंग, कविठा बु. व हनवतखेडा या तीनही ग्रामपंचायतींमध्ये सरपंचपद अविरोध झाले. वज्झर ग्रामपंचायतीच्या सदस्य निवडीवर बहिष्कार असल्याने तेथे प्रशासक नेमण्यात आला आहे.

तालुक्यात जानेवारी महिन्यात ४४ ग्रामपंचायतीच्या सार्वत्रिक निवडणुका घेण्यात आल्या. त्यात चार ग्रामपंचायती वगळता सर्व ठिकाणी सरपंचपदाची निवडणूक झाली. अचलपूर तालुक्यातील वडनेर भूजंग, कविठा बु. व हनवतखेडा ग्रामपंचायतीत सरपंचपदाच्या आरक्षणानुसार त्या प्रवर्गाचा एकही सदस्य नसल्याने तेथे अचलपूरचे उपविभागीय अधिकारी संदीपकुमार अपार यांनी शासनाने दिलेल्या अधिकाराचा वापर करीत सरपंच आरक्षणात बदल केला. त्यानुसार शुक्रवारी झालेल्या सरपंचपदाच्या अविरोध निवडीत वडनेर भूजंग ग्रामपंचायतीच्या सरपंचपदावर प्रीती काळबांडे, कविठा बुजरूक ग्रामपंचायतीच्या सरपंचपदी सोनल फुंदे, तर हनवतखेडा ग्रामपंचायतीच्या सरपंचपदावर अरुण झाकर्डे यांची अविरोध निवड झाल्याची माहिती निवडणूक नायब तहसीलदार अक्षय मांडवे यांनी दिली.

बॉक्स

वज्झर ग्रामपंचायतीचा पेच

वज्झर ग्रामपंचायतीच्या आठ जागा रिक्त आहेत. परिणामी येथे सरपंच व उपसरपंच पदासाठी निवडणूक कोरम पूर्ण नसल्याने होऊ शकली नाही. त्यामुळे येथे सदस्यपदासाठी पोटनिवडणुकीचा कार्यक्रम लावला जाणार आहे. परिणामी या ग्रामपंचायतीवर प्रशासकाची नियुक्ती करण्यात आली. तेथे सर्वाधिक प्रमाणात आदिवासी लोकसंख्या असताना १५ वर्षांपासून इतर मागासवर्गीय असे सरपंच आरक्षण येत असल्याने नागरिकांनी ग्रामपंचायत निवडणुकीवर बहिष्कार टाकला होता.