परतवाड्यात विनापरवाना प्रवासी वाहतुकीचा अतिरेक

अनिल कडू

परतवाडा : विनापरवाना अवैध प्रवासी वाहतूक करणाऱ्या खासगी वाहनांनी परतवाड्यात अतिरेक चालविला आहे. परतवाडा बसस्थानकाबाहेरील २०० मीटरच्या नो पार्किंग झोनमध्ये रोडवर या बसेस उभ्या करून वाहतुकीस अडथळा निर्माण केला जात आहे.

बसस्थानक परिसरातून प्रवाशांची उचल होत असल्यामुळे एसटी महामंडळाला लाखोंचा फटका बसत आहे. यात काहींची दादागिरी आणि अरेरावी बघायला मिळत आहे. सामान्य नागरिकांनाही याचा त्रास होत आहे. या अनुषंगाने विभागीय नियंत्रकांनी जिल्हा पोलीस अधीक्षक हरिबालाजी एन. यांना सविस्तर पत्र दिले आहे. अवैध प्रवासी वाहतूक करणाऱ्या वाहनांविरुद्ध आणि नो पार्किंग झोन कायद्याचे उल्लंघन करणाऱ्यांविरुद्ध सक्त कारवाईचे आदेश देण्याबाबत सुचविले. परतवाडा बसस्थानकासमोरून रोज अशा ८० ते ९० बसेस विनापरवाना प्रवासी वाहतूक करीत असल्याचे पत्रात म्हटले आहे. या बसचे महाराष्ट्र व मध्य प्रदेशातील प्रवासी वाहतुकीचे मूळ परवाने व वेळापत्रक तपासण्याची मागणीही पत्रात केली आहे.

दरम्यान, प्रादेशिक परिवहन अधिकाऱ्यांनी अशा विनापरवाना प्रवासी वाहतूक करणाऱ्या बसेसचे संचालन बंद करणेबाबत परतवाड्यातील दोन, आकोट व अंजनगाव सुर्जी येथील प्रत्येकी एक अशा एकूण चार बस संचालकांवर नोटीस बजावली आहे. विनापरवाना अवैधरीत्या प्रवासी वाहतूक करताना वाहन आढळून आल्यास ते वाहन जप्त करून दंडात्मक कारवाई केली जाणार असल्याचे प्रादेशिक परिवहन अधिकाऱ्यांनी नोटीसमध्ये नमूद केले आहे. या नोटीसमध्ये परिवहन अधिकाऱ्यांनी त्या वाहनांचे नंबरही नमूद केले आहेत. यात काही वाहन मध्यप्रदेश पासिंगची आहेत.

परतवाड्यातून होणाऱ्या विनापरवाना अवैध प्रवासी वाहतूक करणाऱ्या वाहन संचालकांचा जुनाच वाद आहे. यातून एकमेकांविरुद्ध तक्रारीही घडत आहेत. प्रादेशिक परिवहन अधिकाऱ्यांनी बजावलेल्या नोटीस, एसटी महामंडळाच्या विभागीय नियंत्रकांनी जिल्हा पोलीस अधीक्षकांना दिलेले पत्र व पोलीस तक्रारीच्या अनुषंगाने अवैध प्रवासी वाहतुकीवर अंकुश लागतो की ती अधिक फोफावते, याकडे नागरिकांचे लक्ष लागले आहे.