वनगुन्ह्यातील जप्त पोकलँड सरकारजमा करण्यास वनाधिकाऱ्यांचा नकार

अनिल कडू

परतवाडा : अंजनगाव वनपरिक्षेत्रातील राखीव वनात, वन उत्पादनाचे (गाळ, मुरूम) विनापरवानगी उत्खनन करणाऱ्या वनगुन्ह्यात जप्त पोकलँडला सरकारजमा करण्यास सहायक वनसंरक्षकांनी नकार दिला आहे.

अंजनगाव वनपरिक्षेत्रातील राखीव वनात हा गुन्हा घडला. वनविभागाची परवानगी न घेता राखीव वनात पोकलँडद्वारे अवैध उत्खनन करून संबंधितांनी ट्रकद्वारे गाळ व मुरमाची अवैध वाहतूक केल्याचे मुरुमाचे (वनउत्पादन) उत्खनन करून नैसर्गिक नाल्यांमध्ये टाकून नाल्यात अडथळा निर्माण केल्याचे सहायक वनसंरक्षकांना मान्य आहे. मेळघाट प्रादेशिक वनविभाग परतवाडा येथील वनसर्व्हेअर आणि वनपरिक्षेत्राधिकारी अंजनगाव यांच्यासह संबंधित वनरक्षक व वनपालाचे स्पष्ट अहवालही आहेत. यात प्रत्यक्षदर्शी दोन साक्षीदारही आहेत. तरीदेखील जप्त पोकलँडद्वारे राज्य शासनाची मालमत्ता असलेल्या इमारती लाकूड, चंदन लाकूड, जळाऊ लाकूड, कोळसा किंवा इतर अधिसूचित वन उत्पादनाबाबत वनगुन्हा घडलेला नाही, असे नमूद करून जप्त पोकलँड सरकारजमा करण्याबाबतचा वनपरिक्षेत्र अधिकारी अंजनगाव यांचा अर्ज, २८ जुलै २०२१ ला सहायक वनसंरक्षकांनी फेटाळला. असे करताना जैवविविधता कायद्याचा मात्र त्यांना विसर पडला. सहायक वनसंरक्षकांनी पारित केलेला हा आदेश सध्या वनविभागांतर्गत चर्चेत आहे. व्हाॅट्सॲप ग्रुपवरही तो बऱ्यापैकी व्हायरल होत आहे.

बॉक्स

असा घडला वनगुन्हा

संबंधितांनी राखीव नातील सर्वे क्रमांक ०५ मधील सावरपाणी धरणातून वनउत्पादनाचे पोकलँड मशिनच्या साह्याने अवैधरीत्या उत्खनन केले. विनापरवानगी राखीव वनखंड क्रमांक १०६५ आणि १०६६ मध्ये नवीन रस्ता तयार केला. वन उत्पादनाची वनाबाहेर वाहतूक केली. यावरून २१ एप्रिल २०२१ रोजी वनगुन्हा नोंदविल्या गेला.

--

परवानगी आधीच सर्व काही

१७ एप्रिल २०२१ ला वनपरिक्षेत्र अधिकाऱ्यांनी मोका स्थळाची पाहणी केली. तेव्हा त्यांना परवानगी आधीच सावरपाणी धरणातून गाळ, मातीची वाहतूक केल्याचे निदर्शनास आले. याकरिता नवीन कच्चा रस्ता तयार केल्याचेही त्यांना आढळून आले. सदर उत्खनन केलेले ठिकाण व नवीन कच्चा रस्ता तयार केलेले ठिकाण हे वनजमीन असल्याचे ही त्यांचे निदर्शनास आले.

--

राखीव वनात घडला गुन्हा

वनपरिक्षेत्र अधिकारी अंजनगाव आणि वनविभागाच्या विभागीय कार्यालयातील वनसर्व्हेअर व वनकर्मचाऱ्यांनी २१ एप्रिल २०२१ रोजी परत घटनास्थळी जाऊन तपासणी केली. उत्खनन झालेले ठिकाण हे चिंचोना नियत क्षेत्रातील सर्वे क्रमांक ०५ मधील राखीव वनात झाल्याचे तपासणीत त्यांना आढळून आले. नवीन तयार केलेला कच्चा रस्ता सावरपाणी नियतक्षेत्रातील वनखंड १०६५ व १०६६ मधील राखीव वनात तयार केल्याचेही आढळले.