आरोग्य अभियानात दोघांची सेवा समाप्त, एकाची बदली

अमरावती : जिल्हा परिषदेच्या राष्ट्रीय ग्रामीण आरोग्य अभियानात दोन कर्मचाऱ्यांच्या सेवा समाप्तीचे तर एका कर्मचाऱ्यांच्या बदलीचे आदेश अचानक धडकल्याने अभियानातील कर्मचाऱ्यांमध्ये धास्ती पसरली आहेत. विशेष म्हणजे ऐन कोरोनाच्या संकटात थेट आदेश धडकल्याने मिनी मंत्रालयात याबाबत तर्कवितर्क लावले जात आहे.

गत काही महिन्यांपासून कोरोना विषाणूचा संसर्ग शहरापाठोपाठ ग्रामीण भागात चांगलाच पसरत आहे. त्यामुळे आरोग्य यंत्रणेची धावपळ होत असतानाच राष्ट्रीय ग्रामीण मिशनमधील अधिकारी व कर्मचाऱ्यावर होत असलेल्या कारवाईमुळे राजकीय शह-काटशहाचे राजकारण रंगत आहे. एनआरएचएमचे जिल्हा व्यवस्थापक अशोक कोठारी यांची पुणे येथे समकक्ष पदावर बदली करण्यात आली. यापूर्वी याच अभियानातील जिल्हा सनियंत्रण अधिकारी असलेल्या प्रफुल्ल रिधोरे यांची गत आठवड्यात सेवा समाप्त करण्यात आली आहे. यानंतर दोनच दिवसांपूर्वी जिल्हा आशा समन्वयक शशिकांत सभाने यांचासुद्धा सेवा समाप्तीचा आदेश धडकलात. जिल्ह्यात एकीकडे कोरोनाचा वाढता संसर्ग लक्षात सर्वत्र चिंतेचे वातावरण असताना आरोग्य मिशनमधील अधिकाऱ्यांच्या उचलबांगडी सत्र सध्या सुरू झाले आहे. अशातच आता राष्ट्रीय ग्रामीण आरोग्य अभियानात जिल्हा व्यवस्थापक अशोक कोठारी यांची समकक्ष पदावर पुण्यात बदली केल्यानंतर या पदावर वर्णी लावण्यासाठी जोरदार लॉबिंग सुरू झाले आहे.