अंजनगावात घराला भीषण आग

फोटो पी २२ अंजनगाव आग

वनोजा बाग : अंजनगाव सुर्जी शहरातील टाकरखेड रोडवरील सरस्वतीनगरमध्ये प्रफुल आवारे यांच्या घराला २२ जून रोजी सकाळी १० वाजताच्या सुमारास भीषण आग लागली. या आगीत घरातील सर्व साहित्य जळून भस्मसात झाले.

प्रफुल रामकृष्ण आवारे यांच्या घराला सकाळी कोणी नसताना आग लागली. आगीची माहिती नगर परिषदेच्या अग्निशमन विभागाला देण्यात आली. या घरातील सर्व सदस्य बाहेरगावी असल्याने कोणतीही जीवितहानी झाली नाही. मात्र, घरातील अन्नधान्य, कपडे व इतर साहित्याचे मोठ्या प्रमाणात नुकसान झाले. घरातील रोख १,६५,००० रुपये व २० ग्रॅम सोने जळून खाक झाले, अशी माहिती प्रफुल्ल आवारे यांनी दिली. महसूल विभागाच्या पंचनाम्यानंतर नुकसानाची नेमकी माहिती समोर येणार आहे.

शॉर्ट सर्कीटमुळे आग लागल्याची शंका स्थानिकांकडून व्यक्त केली जात आहे. अग्निशमन दलाच्या जवानांनी घटनास्थळी पोहोचून आगीवर नियंत्रण मिळविले. मात्र तोपर्यंत पूर्ण घर जळून खाक झाले. प्रफुल्ल आवारे यांना आर्थिक मदतीची मागणी नागरिकांनी केली आहे.