अंगणवाडी सेविकांना मोबाईलचा वाढीव भत्ता

अमरावती : अंगणवाडी सेविकांना आता या महिन्यापासून ४०० ऐवजी ६०० रुपये मोबाईल भत्ता मिळणार आहे. कॉलिंग व इंटरनेट पॅकच्या दरात वाढ झाल्याने महागाईची झळ कमी करण्याच्या उद्देशाने राज्याच्या महिला व बालविकास विभागाने हा निर्णय घेतला आहे. याचा लाभ जिल्ह्यातील २,६४४ अंगणवाडी सेविकांना होणार आहे. यासाठी १६ लाख ५६ हजार रुपयांची रक्कम संबंधिताच्या बॅक खात्यावर जमा केली जाणार आहे.

अंगणवाडी सेविकांचे ऑनलाइन कामकाज करणे सोयीचे व्हावे म्हणून राज्य शासनाकडून मोफत मोबाईल देण्यात आले. त्यावर कॉलिंग व इंटरनेटसाठी ४०० रुपयेदेखील देण्यास सुरुवात झाली . दर तीन महिन्यातून एकदा याप्रमाणे ही रक्कम महिन्याच्या सुरुवातीला संबंधित अंगणवाडी सेविका, पर्यवेक्षिका, पोषण समन्वयकांच्या खात्यावर जमा केली जाणार आहे. गत काही महिन्यांपासून इंटरनेटच्या पॅकची किंमत वाढल्याने दिल्या जाणाऱ्या रक्कमेत वाढ करावी, अशी मागणी होत होती. या मागणीची दखल घेत महिला व बालकल्याण विभागाने २०० रुपये वाढ करण्याचा निर्णय घेतला आहे. जिल्ह्यात २६४४ अंगणवाडी सेविका,१०१ पर्यवेक्षक आणि १५ तालुका समन्वयक आदींना मार्च ते मे या तीन महिन्यांच्या कालावधीसाठी प्रत्येकी ६०० रुपयाप्रमाणे १६ लाख ५६ हजार रुपये मिळणार आहेत.

बॉक्स

या कामासाठी मोबाईलचा वापर

मोबाईलच्या माध्यमातून रोजचा आहार, बालकांची निरीक्षणे स्वाध्याय, हजेरी रजिस्टर भरणे आदी कामे केली जातात. अंगणवाडीशी संबंधित कामकाज मोबाईलच्या माध्यमातून बऱ्यापैकी ऑनलाईन होते. सध्या अंगणवाडी बंद असल्या तरी देखील इतर कामांच्या नोंदी तेथे बसूनच काही क्षणात जिल्हा परिषदेतील महिला बालकल्याण विभागात पोहचतात. मोबाईलने काम सुलभ करणे सोयीचे होणार आहे.

कोट

अंगणवाडी कर्मचाऱ्यांना तीन महिन्यांचा भत्ता महिन्याच्या सुरुवातीला दिला जातो. या वेळी वाढीव भत्ता देण्यात येणार आहे. याकरिता शासनाकडून निधी मंजूर झाला आहे.सदर रक्कम लवकरच संबंधितांचे खात्यात जमा केली जाईल.

- प्रशांत थोरात,

उपमुख्य कार्यकारी अधिकारी महिला व बालविकास