आयपीएस चौकशी पथकाचा एसपी कार्यालयात तीन तास ठिय्या

धारणी पोलिसांच्या तपासातील बारकावे तपासले, अपर पोलीस महासंचालक मुंबईकडे रवाना

अमरावती : हरिसाल येथील वनपरिक्षेत्र अधिकारी दीपाली चव्हाण यांच्या आत्महत्या प्रकरणात श्रीनिवास रेड्डींच्या भूमिकेच्या चौकशीसाठी अपर पोलीस महासंचालक प्रज्ञा सरवदे यांच्या अध्यक्षेखाली गठित चार सदस्यीय चौकशी पथकाने बुधवारी येथील जिल्हा पोलीस अधीक्षक कार्यालयात तीन तास ठिय्या मांडला. धारणी पोलिसांनी दाखल केलेल्या फौजदारी प्रकरणाशी संबंधित कागदपत्रांची या पथकाने तपासणी केली. सकाळी १० ते १ वाजता दरम्यान हे पथक एसी कार्यालयात होते.

दीपाली आत्महत्याप्रकरणी गुगामल वन्यजीव विभागाचे उपवनसंरक्षक विनोद शिवकुमार याच्यावर भादंविच्या ३०६ कलमान्वये गुन्हा नोंदविला. तसेच शिवकुमार याचे निलंबन झाले असून, सध्या तो कारागृहात बंदीस्त आहे. मात्र, निलंबित अपर प्रधान मुख्य वनसंरक्षक एम.एस. रेड्डी यांच्यावर गुन्हे दाखल करण्यासाठी समाजमनाचा रेटा वाढत आहे. त्याअनुषंगाने राज्य शासनाने रेड्डींच्या भूमिकेची चौकशीसाठी अपर पोलीस महासंचालक डॉ. प्रज्ञा सरवदे यांच्या अध्यक्षतेत प्राथमिक चौकशी पथक गठित केले आहे. या पथकातील पोलीस निरीक्षक राजेंद्र तेंडुलकर यांच्या मार्गदर्शनात २१ ते २४ एप्रिल असे चार दिवस या चमूने दीपाली प्रकरणाशी निगडित लोकांचे बयाण नोंदविले. २६ एप्रिल रोजी चौकशी पथक प्रमुख आयपीएस डॉ. प्रजा सरवदे अमरावतीत दाखल झाल्यात. याच दिवशी दीपाली यांच्या पतीचे नोंदविलेल्या बयाणांचे ‘क्रॉस चेकींग’ करण्यात आले. २७ एप्रिल रोजी सरवदे यांनी हरिसाल गाठले. दीपालीचे शासकीय निवासस्थान, वनकर्मचाऱ्यांचे बयाण नोंदविले. काही स्थळांवर भेटी दिल्यात. स्थानिकांशी संवाद साधला. आता आयपीएस डॉ. सरवदे यांना ३० एप्रिलपर्यंत राज्य शासनाकडे चौकशी अहवाल सादर करावा लागणार आहे. सरवदे या बुधवारी सकाळी ९ वाजता मुंबईकडे रवाना झाल्याची माहिती आहे. मात्र, पथकातील चमूने एसपी कार्यालय गाठले आणि दीपाली प्रकरणाशी संबंधित कागदपत्रांची पडताळणी केली.

-------------------

पथकाची चौकशी गोपनीय, प्रसारमाध्यमांशी बोलणे टाळले

आयपीएस डॉ. प्रज्ञा सरवदे यांचे चौकशी पथक २१ ते २८ एप्रिल या दरम्यान अमरावती, हरिसाल येथे दौऱ्यावर होते. मात्र, या आठ दिवसांत प्रसारमाध्यमांशी कुणीही बोलले नाही. नोंदविलेले बयाण, कागदपत्रांची पडताळणी, मेळघाट व्याघ्र कार्यालयात कागदपत्रांचे सर्चिंग, एसपी कार्यालयात तपास, धारणी पोलिसांसोबत चर्चा आदी दीपाली आत्महत्या प्रकरणाशी संबंधित बाबी अतिशय गेपनीय ठेवण्यात आल्या आहेत. जे काही चौकशीत असेल ते राज्य शासनाला अहवालाद्धारे सादर केले जातील, एवढेच टिपिकल उत्तर पथकाचे होते.