अंबा नाल्यातील पाण्यात बुडून इसमाचा मृत्यू

अमरावती : अंबा नाल्यात पडल्याने एका इसमाचा बुडून मृत्यू झाल्याची घटना शनिवारी लालखडी स्थित पुलाजवळ घडली. किशोर पाडुरंग मोटघरे (४८ रा. सुकळी) असे मृताचे नाव आहे. रत्नपाल किशोर मोटघरे (२१, रा. सुकळी) यांच्या माहितीवरून नागपुरी गेट पोलिसांनी घटनेत आकस्मिक मृत्यूची नोंद केली. घटनेचा प्राथमिक तपास पोलीस उपनिरीक्षक ठाकरे यांनी केला.

0000000000000000000000

छत्री चौकात आढळला वृध्दाचा मृतदेह

अमरावती : बडनेरा येथील जुन्या बसस्थानकाजवळ शनिवारी ६० ते ६५ वयोगटातील वृध्दाचा मृतदेह आढळून आला. माहितीवरून बडनेरा पोलिसांनी घटनास्थळी पंचनामा केला. मृतदेह शवविच्छेदनाकरिता जिल्हा सामान्य रुग्णालयात नेला. या घटनेत बडनेरा पोलिसांनी आकस्मिक मृत्यूची नोंद केली. घटनेचा प्राथमिक तपास पोलीस उपनिरीक्षक प्रशांत डगवार यांनी केला.

00000000000000000000

दोन अवैध दारू अड्ड्यावर धाडी

अमरावती : शहर पोलिसांनी विविध ठिकाणच्या दोन अवैध दारू अड्ड्यांवर धाड टाकून तीन आरोपींना अटक केली. नागपुरी गेट पोलिसांनी रतनगंज नाल्याजवळील अवैध दारू अड्ड्यावर धाड टाकून भगवानदास अहेरवार (२४ रा. मसानगंज) याला अटक केली. त्याच्याकडून ६२४ रुपयांचा मुद्देमाल जप्त केला. वलगाव पोलिसांनी शिराळा गावातील पुलाजवळ ऋषिकेश रामदास काटोले (२०) व वैभव पंजाब तिखिले (२७ दोन्ही रा. नारायणनगर, चांदूर बाजार) यांच्या ताब्यातून दारू व दुचाकी असा ३९,३२० रुपयांचा मुद्देमाल जप्त केला.

0000000000000000000000

शस्त्रांची दहशत पसरविणाऱ्या तिघांना अटक

अमरावती : तलवार, चाकू व गुप्तीसारखे धारदार शस्त्र हाती बाळगून नागरिकांमध्ये दहशत पसरविणाऱ्या तीन तरुणांना राजापेठ पोलिसांनी २० जून रोजी हमालपुरा स्थित करण बारसमोरून अटक केली. सूरज विलास चावरे (३०), अमित प्रकाश सवई (२३) व सौरभ संजय घरडे (२३ तिन्ही रा. हमालपुरा) अशी आरोपींची नावे आहेत. त्यांच्याकडून तलवार, चाकू व गुप्ती पोलिसांनी जप्त केले.