अवघ्या सहा तासांत ‘ते’ दोघे हवालातीत

अमरावती : चाकूचा धाक दाखवून रोख रक्कम लुटण्याचा प्रयत्न करणाऱ्या दोघांना अवघ्या सहा तासांत हवालातीआड करण्यात आले. राजापेठ पोलिसांनी ९ सप्टेंबर रोजी रात्री ही यशस्वी कारवाई केली. विनय ऊर्फ चिंटू मोहोड (४३, रा. जेवडनगर, अमरावती) व कामेश नितनवरे (३०, रा. दसरा मैदान झोपडपट्टी, अमरावती) अशी अटक आरोपींची नावे आहेत.

९ सप्टेंबर रोजी सायंकाळदरम्यान राजापेठ हद्दीतील हिंमत पेट्रोल पंप, जुना बाय पास रोडवर अज्ञात आरोपींनी चाकूचा धाक दाखवून एका इसमाकडील रोख रक्कम लुटण्याचा प्रयत्न केला. फिर्यादीच्या जबानी रिपोर्टवरून राजापेठ पोलिसांनी अज्ञाताविरुद्ध भादंविचे कलम ३९३ अन्वये गुन्हा दाखल करण्यात आला.

गुन्हा दाखल करताच ठाणेदार मनीष ठाकरे यांच्या नेतृत्वात एक तपास पथक रवाना करण्यात आले. दरम्यान, तपासात पोलिसांनी सीसीटीव्ही फुटेजची पाहणी केली. त्यात दोघेही बंदिस्त झाले होते. त्या माहितीवरून विनय ऊर्फ चिंटू मोहोडचा शोध घेण्यात आला. त्याला मार्डी येथून अटक करण्यात आल्यानंतर ‘खाकीच्या करिश्म्याने’ त्याने जोडीदाराचे नावदेखील सांगितले. त्याचा साथीदार कामेश नितनवरे याला दसरा मैदान झोपडपट्टी भागातून अटक करण्यात आली. त्यांच्याकडून चाकू व विना नंबरची दुचाकी जप्त करण्यात आली. सदर गुन्ह्याचा तपास राजापेठ पोलिसांनी केवळ सहा तासांत लावून आरोपींना अटक करण्यात यश प्राप्त केले.