लाकूड तस्करीतील त्या मुख्य आरोपीस अखेर अटक

परतवाडा : अचलपूर पोलिसांनी लाकूड तस्करी प्रकरणातील वाहनासह सोडलेल्या मुख्य आरोपीस अखेर परतवाडा वनविभागाने अटक केली. चेतन सोनुकले (२३, रा. सुलतानपुरा, अचलपूर) असे मुख्य आरोपीचे नाव आहे. अचलपूर पोलिसांनी सुलतानपुरालगतच्या नदीवरील पुलावर पकडलेले अवैध सागवान घेऊन आलेले वाहन सोडल्याची सविस्तर हकीकत वनविभागाला त्याने सांगितली. पण, यात वनविभागाला हवे असलेल्या त्या वाहनाची माहिती त्याच्याकडून मिळाली नाही.

चेतन सोनुकलेने अचलपूर पोलिसांच्या तावडीतून सोडवून घेतलेले सागवान सुलतानपुऱ्यातील प्रेमदास दाभाडे यांच्याकडे ठेवण्यास दिले. ही लाकडे परतवाडा वनपरिक्षेत्र अधिकाऱ्यांनी ६ ऑगस्टलाच दाभाडे यांच्याकडून ताब्यात घेतले. तेव्हापासून वनविभाग चेतन सोनुकलेच्या मागावर होते. यादरम्यान सोनुकले याने अचलपूर न्यायालयाकडे अटकपूर्व जामीनसाठी अर्ज केला; पण न्यायालयाने तो फेटाळून लावला. तेव्हापासून तो फरार होता.

यापूर्वीही अटक

अवैध सागवान तस्करी प्रकरणात नोव्हेंबर २०२० मध्ये चेतन सोनुकलेसह स्वप्निल हिरुळकर यास परतवाडा वनविभागाने अटक केली आहे. याप्रकरणी लाकडांसह एक ऑटो व मोटारसायकल वनविभागाने ताब्यात घेतली आहे.

* अशीही गंमत

अवैध सागवान लाकूड तस्करी प्रकरणात मुख्य आरोपी चेतन सोनुकले असताना अचलपूर पोलिसांनी मोठी रक्कम घेऊन वाहन सोडल्याची तक्रार पोलीस अधिकाऱ्यांकडे स्वप्निल हिरुळकर याने केली होती. या अनुषंगानेही स्वप्निल हिरुळकरचा या प्रकरणाशी असलेला संबंध चेतन सोनुकलेकडून वनविभाग जाणून घेत आहे.

अचलपूर परतवाड्यात तस्करी

मेळघाटसह मध्य प्रदेशातील व अंजनगाव वनपरिक्षेत्रातील अवैध सागवानाच्या तस्करीकरिता परतवाडा शहरात तस्करांचे हस्तक सक्रिय आहेत. हे हस्तक अवैध सागवान लाकूड घेणाऱ्यांच्या संपर्कात राहून त्यांच्या मागणीनुसार लाकूड पुरवितात. अचलपूरमधील त्या लाकूड तस्करीत परतवाड्यातील अशाच काही हस्तकांची नावे पुढे आली आहेत. ही मंडळी अचलपूर परतवाड्यासह ग्रामीण भागात अवैध सागवान तस्करी करीत आहेत. या लाकूड तस्करीच्या अनुषंगाने ब्राह्मणवाडा थडी येथील काही मंडळीही चर्चेत आली आहेत.

कोट

अचलपूरमधील त्या प्रकरणाशी संबंधित मुख्य आरोपी चेतन सोनुकले यास अटक केली आहे. पुढील तपास सुरू आहे.

- प्रदीप भड, वनपरिक्षेत्र अधिकारी, परतवाडा

दिनांक 22/09/21 फोटो दिनांक24/09/21 फोटो