मुक्कामादरम्यान जुळविले सूत; ज्युसमधून गुंगीचे औषध देऊन अल्पवयीन मुलीवर अत्याचार

लग्नासाठी हेका, आईवडिलांना मारण्याची धमकी

अमरावती : मुक्कामादरम्यान त्याने तिच्याशी प्रेमसूत जुळविले. सात महिन्यांपुर्वी तिला बहाण्याने दुचाकीवर नेऊन ज्युस पाजला. त्या ज्युसमधून त्याने तिला गुंगीचे औषध दिल्याने ती बेशुध्द झाली. तिच्या बेशुध्दावस्थेचा गैरफायदा घेत तिच्यावर एका लॉजमध्ये बलात्कार करण्यात आला. अंजनगाव सुर्जी पोलीस ठाण्याच्या हद्दीत २४ मे रोजी ही धक्कादायक घटना उघड झाली. याप्रकरणी पोलिसांनी आरोपी स्वप्निल भुजंगराव रोकडे (३२, ता. अंजनगाव सुर्जी) याच्याविरूद्ध बलात्कार, विनयभंग, शिविगाळ व पोस्कोअन्वये गुन्हा दाखल केला. यातील पिडिता ही १७ वर्षांची आहे.

तक्रारीनुसार, एका औषध कंपनीची मीटिंग आटोपून आरोपीने पीडिताच्या घरी मुक्काम केला तेव्हापासून पीडिता व आरोपीमध्ये प्रेम संबंध जुळले. ऑगस्ट २०२२ मध्ये आरोपीने पिडिताला तिच्या आई- वडिलांची तब्येत ठीक नाही, असे सांगून दुचाकीवर नेले. अंजनगाव पोलीस ठाण्याच्या हद्दीतील एका जूस सेंटरला थांबून तिला ज्यूस पाजला. त्यात गुंगीचे औषध मिसळल्याने नंतर तिला भोवळ येऊन तिची शुद्ध हरपली. थोड्यावेळाने ती शुध्दीत आली असता आपण लॉजवर आहोत, येथे आरोपीने आपल्याशी जबरदस्तीने शारीरिक संबंध केल्याची जाणीव पिडितेला झाली. घटनेची वाच्यता केल्यास तुझ्या आई-बाबांना मारून टाकेल, अशी धमकी त्याने दिल्याचे पिडितेने तक्रारीत म्हटले आहे.

विनयभंग, शिविगाळदेखील

१८ मार्च रोजी आरोपीने पीडितेला सातेगाव फाट्यावर बोलावले. तेथे माझ्याशी लग्न कर नाहीतर आई वडिलांना खतम करतो, अशी धमकी दिली. तिचे केस ओढून विनयभंग केला. ही घटना पीडिताने तिच्या आई- वडिलांना सांगितली. तिच्या आई-वडिलांनी आरोपी स्वप्निलला हरतऱ्हेने समजावून सांगण्याचा प्रयत्न केला. मात्र उलटपक्षी आरोपीने पिडितेच्या आई-वडिलांना शिविगाळ केली. त्यामुळे १७ वर्षीय पिडितेने २४ मे रोजी सायंकाळी अंजनगाव सुर्जी पोलीस ठाणे गाठले. तेथे पोलिसांनी रात्री आठच्या सुमारास गुन्हा दाखल केला.

पिडितेच्या तक्रारीवरून बुधवारी रात्री आरोपीविरूद्ध गुन्हा दाखल केला. आरोपीला तत्काळ अटक करण्यात आली. त्याला न्यायालयात हजर करण्यात आले.

- दीपक वानखडे, ठाणेदार, अंजनगाव सुर्जी