‘मिनी मंत्रालया’तच डेंग्यू अळ्यांचे केंद्र

डासांची उत्पत्तिस्थाने, कुठे कूलरमध्ये पाणी, कुठे ड्रेनेज तुंबले

अमरावती : डेंग्यू व अन्य आजारांना कारणीभूत असलेल्या डासांची उत्पत्तिस्थाने म्हणजे साचून राहिलेले पाणी. त्यामुळे पाणी साचू देऊ नका, असे आवाहन जिल्हा परिषद आरोग्य विभागाकडून करण्यात येते. मात्र, स्वत:च्या दिव्याखालचा अंधार प्रशासकीय यंत्रणेला दिसत नाही, अशी स्थिती लोकमतने गुरुवारी ‘मिनी मंत्रालया’त केलेल्या निरीक्षणात दिसून आली. यात काही कार्यालयांमध्येच डासांची पैदास केली जात असल्याचे दिसून आले.

कूलरच्या टपात पाणी साचू देऊ नका. कचरा वेळोवेळी साफ करा. अडगळीचे सामान पडू देऊ नका. यात पाणी साठवून डेंग्यूचा आजार होण्याचा धोका असतो, असे प्रशासन वारंवार सांगत आहे. डेंग्यूचा प्रसार रोखण्यासाठी सूक्ष्म नियोजन करण्याचे निर्देश जिल्हा परिषद प्रशासनाने दिले. यासाठी नुकताच मुख्य कार्यकारी अधिकारी यांनी नुकताच आढावा घेऊन उपाययोजना करण्याच्या सूचनाही दिल्या. मात्र, खुद्द जिल्हा परिषदेच्या आरोग्य, पाणीपुरवठा व स्वच्छता विभागाच्या कार्यालयात कूलरच्या टाक्यात पाणी साचून असल्याचे चित्र दिसून आले, तर बांधकाम विभागाच्या बाजूला सांडपाणी वाहून नेणारी नाल्या तुडुंब भरल्याचे दिसले. ग्रामीण पाणी पुरवठा विभागाच्या बाजूलाच कचऱ्याचे ढीगही तसेच पडून आहेत. ज्या ठिकाणाहून प्रशासनाचा कारभार चालतो, त्याची प्रचिती जिल्हा परिषद कार्यालयात दिसून आली.

बॉक्स

गावखेड्यात घरोघरी तपासणी, मग इकडे का नाही?

डेंग्यूचा डास सकाळी व सायंकाळच्या सुमारास चावत असल्याचे आरोग्य विभागाकडून सांगण्यात आले. एडिस इजिप्टाय या डासापासून डेंग्यू आणि चिकुणगुनिया ही होऊ शकतो. हा डास हा स्वच्छ पाण्यात होतो. आतापर्यंत कूलरच्या पाण्यात या डासाची उत्पत्ती अधिक प्रमाणात झाली असल्याचे आरोग्य विभागाने केलेल्या निष्कर्षात पुढे आले आहे. शहरासह जिल्ह्यात काही दिवसापासून डेंग्यू रुग्णांची संख्या वाढलेली आहे. त्यामुळे संबंधित गावात सर्वेक्षणाच काम घरोघरी सुरू केले आहे. असे असताना गावात सर्वेक्षण मात्र कार्यालयात कोण करणार, हा प्रश्न उपस्थित होत आहे.

बॉक्स

नागरिकांना दिसणारी अस्वच्छता प्रशासनाला का दिसत नाही?

जिल्हा परिषद कार्यालयात सांडपाणी वाहून नेणाऱ्या नालीमध्ये पाणी तुंबले. आजूबाजूला कचरा पडला. या दूषित पाण्यामुळे विविध संसर्गजन्य आजारांचा धोका निर्माण झाला आहे. जिल्हा परिषद कार्यालयातील कुलर मध्ये पाणी साचले आहे. याचबरोबर अडगळीच्या साहित्यात पाणी साचून डेंग्यूचे मच्छर वाढण्याचा धोका निर्माण झाला आहे. ज्या विभागात लगत कुलर लागले आहेत. त्या कूलरमधील पाणीही गेल्या किती दिवसांत बदललेले नाही. पावसात कूलर काढण्याची गरज असताना ती तसेच पडून आहेत. नागरिकांना दिसणारी ही अस्वच्छता अधिकारी-कर्मचाऱ्यांना दिसत नाही का, असा सवाल उपस्थित करण्यात येत आहे.