चुकून काढलेला व्हिडिओ पॉर्न साईटवर व्हायरल

धामणगाव रेल्वे : कपडे बदलविताना चुकून काढलेला व्हिडिओ पॉर्न साईटवर व्हायरल झाल्याची धक्कादायक घटना येथे उघड झाली. दोन वर्षांपूर्वी रेल्वे स्थानकावर हरवलेल्या मोबाईलमधून तो व्हायरल करण्यात आल्याची तक्रार एका महिलेने दत्तापूर पोलीस ठाण्यात नोंदवली. सायबर पोलीस या घटनेचा तपास करणार आहेत. धामणगाव तालुक्यातील एका महिलेचा डिसेंबर २०२० मध्ये रेल्वेने प्रवास करीत असताना बडनेरा रेल्वे स्थानक परिसरात मोबाईल हरवला. त्यासंदर्भातील तक्रार त्या वेळी रेल्वे पोलिसांकडे नोंदविण्यात आली होती. मात्र दोन दिवसांपूर्वी जवळच्या काही ओळखीच्या व्यक्तींनी त्या महिलेला सांगितले की तुझा कपडे बदलतानाचा व्हिडिओ अश्लील वेबसाईटवर व्हायरल झाला आहे. सदर व्हिडिओ पाहिला असता तो व्हिडिओ आपलाच असल्याची पीडितेने खात्री केली.

जुन्या मोबाईलमध्ये हा व्हिडिओ चुकीने संग्रहित झाला असावा व ज्या व्यक्तीला हा हरवलेला मोबाईल मिळाला, त्यानेच हा व्हिडिओ व्हायरल केला असल्याची तक्रार गुरुवारी सदर महिलेने दत्तापूर पोलिसात नोंदवली. येथील प्रभारी ठाणेदार शिवशंकर खेडेकर यांनी भादंविचे कलम ३५४ व माहिती तंत्रज्ञान कायदा २००० च्या कलम ६७ अ नुसार अज्ञात आरोपीवर गुन्हा दाखल केला. दरम्यान, सदरचे प्रकरण सायबर गुन्ह्याचे असल्याने सदर प्रकरण त्या विभागाकडे वर्ग करण्यात आले असल्याची माहिती ठाणेदार खेडेकर यांनी दिली आहे.