अनैतिक संबंधाच्या संशयावरून पत्नीची हत्या

काठीने जोरदार प्रहार, साडी पेटविली, कुष्टा खुर्द येथील घटना

परतवाडा : शेजारी राहणाऱ्या युवकाशी अनैतिक संबंध असल्याच्या संशयावरून पतीने पत्नीच्या शरीरावर बांबूच्या काठीने घराबाहेर व घरात जोरदार प्रहार करीत तिची हत्या केली. अचलपूर तालुक्यातील कुष्टा खुर्द येथे शनिवारी रात्री उघडकीस आलेल्या या घटनेने तालुक्यातील ग्रामीण भागात खळबळ उडाली आहे.

पोलीस सूत्रांच्या माहितीनुसार, राहुल गौतम गायकवाड (३०, रा. कुष्टा खुर्द) असे आरोपी पतीचे व प्रिया गायकवाड असे मृत पत्नीचे नाव आहे. पथ्रोट पोलिसांनी राहुलला अटक करून खुनाचा गुन्हा दाखल केला. प्रिया ही अमरावती महानगरपालिका अंतर्गत दस्तुरनगर आरोग्य केंद्रात आशा वर्कर होती, तर राहुल हा मजुरी करतो. त्याने दोन महिन्यांपूर्वी गावातीलच समाजमंदिरात अमरावती येथे प्रियाशी लग्न केले होते. आधीच विवाहित असलेल्या प्रियाला दोन मुले आहेत. अमरावती येथे दोघांचा परिचय झाला होता.

लग्नानंतर राहुल व प्रिया कुष्टा खुर्द येथे राहत होते. शेजारच्या युवकाशी अनैतिक संबंध असल्याचा संशय राहुल वारंवार व्यक्त करीत होता. त्यावरून झालेल्या वादावादीत शनिवारी सायंकाळी त्याने तिला घराबाहेर काढून बांबूच्या काठीने डोक्यावर व हातापायावर मारहाण केली. त्याचा राग येथेच संपला नाही, तर घरात नेऊन पुन्हा मारहाण केली. मध्यरात्री या मारहाणीत तिचा मृत्यू झाला.

बॉक्स

घरात नेऊन साडी पेटविली

राहुलने काठीने मारहाण करीत प्रियाला घरात नेले व तिची साडी पेटविली. या मारहाणीबाबत कळताच पोलीस पाटील सविता धनराज गोंडचोर यांनी या घटनेची फिर्याद पथ्रोट पोलीस ठाण्यात दिली. पोलिसांनी घटनास्थळी जाऊन चौकशी केली असता, महिला दगावल्याचे आढळून आले. अचलपूर उपजिल्हा रुग्णालयात मृतदेह शवविच्छेदनासाठी पाठविण्यात आला असून, पुढील तपास ठाणेदार सचिन जाधव यांच्या मार्गदर्शनात पोलीस कर्मचारी करीत आहेत.

बॉक्स

घरातच होता आरोपी

दोन महिन्यांपूर्वी लग्न झालेल्या पत्नीची हत्या केल्यानंतर राहुल हा घरातच होता. पोलिसांनी त्याला ताब्यात घेऊन चौकशी केली असता, त्याने मारहाणीत प्रियाचा मृत्यू झाल्याचे पोलिसांना सांगितले.

कोट

दोन महिन्यांपूर्वी लग्न करून आणलेल्या पत्नीची काठीने मारून हत्या करण्यात आली. आरोपीला अटक करण्यात आली आहे. पुढील तपास सुरू आहे.

- सचिन जाधव, ठाणेदार, पथ्रोट