नियमित कर्जफेड करणाऱ्या शेतकऱ्यांची उपेक्षा

आसेगाव पूर्णा : राज्य सरकारने दोन वेळा वेगवेगळ्या योजनांतर्गत दोन लाखांपर्यंतची शेतकऱ्यांची कर्ज माफ केली, तर कर्जाची प्रामाणिकपणे परतफेड करणाऱ्या शेतकऱ्यांना सरकारकडून पन्नास हजार रुपये प्रोत्साहनपर अनुदान दिले जाणार होते. मात्र, दोन वर्षे पूर्ण होत आली तरी या शेतकऱ्यांच्या खात्यावर एक रुपयाही आला नाही. याबाबत शासनाने शेतकऱ्यांना ठेंगा दाखविला आहे.

कोरोणाच्या संकटसमयी शासनाने प्रामाणिक शेतकऱ्यांना मदत करावी, अशी चांदूर बाजार तालुक्यातील शेतकऱ्यांची मागणी आहे. शेतकऱ्यांसमोर गारपीट, अतिवृष्टी, नापिकी अशी विविध संकटे समोर आलेली असतानाही या शेतकऱ्यांनी उसनवारी करीत, घरातील दागिने विक्री करून डोक्यावर कर्ज नको म्हणून बँकेचे कर्ज फेडले. अशा शेतकऱ्यांना प्रोत्साहनपर अनुदान मिळणे आवश्यक होते. मात्र, त्यांची दखल शासन घ्यायला तयार नाही. आजही या शेतकऱ्यांसमोर अडचणींचा मोठा डोंगर आहे. रासायनिक खतांच्या वाढलेल्या किमती, डिझेल दरवाढीमुळे ट्रॅक्टरचालकांनी मशागतीच्या कामाचे वाढविलेले दर यामुळे हे शेतकरी अडचणीत आले आहेत. नियमितपणे कर्जाची परतफेड करूनही त्यांच्या पदरी निराशाच आली आहे. आगामी हंगाम पाहता शेतकऱ्यांची आर्थिक अडचण टाळण्यासाठी नियमित फेड करणाऱ्या कर्जदाराच्या प्रश्नाकडे लक्ष देण्याची मागणी आहे.

***********

इंडियन बँकेच्या आसेगाव पूर्णा शाखेतून १५-२० वर्षांपासून पीक कर्जाची नियमित उचल व भरणा करीत आहे. दोन वर्षे पूर्ण होत आले तरी अद्यापही माझ्या खात्यावर कोणत्याही योजनेतील रक्कम परतफेडीनंतर जमा झाली नाही. शासनाने कोरोनासारख्या महामारीत खचलेल्या शेतकऱ्यांना अर्थसाहाय्य देऊन आता तरी मदत करावी.

- अजय तायडे, शेतकरी, टाकरखेडा पूर्णा

-------------

शासनाने प्रामाणिकपणे कर्जाची परतफेड करणाऱ्या शेतकऱ्यांना प्रोत्साहनपर अनुदान म्हणून शासनाकडून पन्नास हजार रुपये दिले. मात्र, अद्यापही माझ्या खात्यावर ते जमा झालेले नाही. मी उलाढाल करून व दागदागिने गहाण ठेवून बँकेतील कर्जाची परतफेड केली. मात्र, शासनाने शेतकऱ्यांची दिशाभूल करून शेतकऱ्यांना ठेंगा दाखविला.

- अंबादास पाटील, शेतकरी, आसेगाव पूर्णा