निजामपूरला वादळाचे थैमान

फोटो पी २९ निजामपूर

परतवाडा : अचलपूर तालुक्यातील निजामपूर गावात बुधवारी रात्रीला ११ वाजता दरम्यान वादळाने चांगलेच थैमान घातले. यात गावातील नऊ ते दहा घरांवरील टिन उडालेत. घरावरील छप्पर कोसळले. गावातील कडूनिंबाची मोठी झाडे उन्मळून पडलीत.

निजामपूर गाव झोपायच्या तयारीत असतानाच अचानक आलेल्या या वादळामुळे गावकरी चांगलेच भयभीत झाले. यात शेतीतील पिकाचेही नुकसान झाल्याचे गावकऱ्यांनी सांगितले.

या वादळाची माहिती रात्रीलाच गावकऱ्यांनी तालुका प्रशासनास दिली. गुरुवारी अचलपूर तालुक्यात दुपारी ३.३० ते चार वाजेच्या दरम्यान वादळ झाले. थोडेबहुत पावसाचे थेंबही पडलेत. वातावरणात अचानक झालेल्या या बदलामुळे शेतकऱ्यांची धावपळ झाली. कांदा उत्पादक शेतकऱ्यांनी शेतातील कांदा झाकण्याकरिता शेताकडे धाव घेतली. लगतच्या ग्रामीण भागातील काही शेतकऱ्यांनी परतवाडा शहर गाठून शेतातील पीक झाकण्याकरिता वेळेवर जाड प्लास्टिक व ताडपत्रीची खरेदी केली. याकरिता ओळखीच्या दुकानदारांना फोन लावून ती दुकाने वेळेवर त्यांनी उघडायला लावली. यात त्या दुकानदारांनीही गरजू शेतकऱ्यांना तेवढ्याच तातडीने मदतही केली. दरम्यान या वादळामुळे व वेगाने वाहणाऱ्या वाऱ्यामुळे अचलपूर परतवाडा शहरासह ग्रामीण भागात विजेचे येणे जाणे सुरू होते. वीज पुरवठा अधून-मधून खंडित होत होता.