परतवाडा येथे ‘विना मास्क घरात प्रवेश नाही’च्या पाट्या

फोटो पी ०२ परतवाडा पाटी

परतवाडा : दुसऱ्या टप्प्यातील कोरोनाने सर्वत्र कहर केला आहे. शासनाकडून कडक लॉकडाऊन लावण्यात आला. दुकानात विनामास्क सामान मिळणार नसल्याच्या पाट्या लागल्या आहेत. अशातच शहरातील काही घरांवर विनामास्क घरात प्रवेश मिळणार नसल्याच्या पाट्या चर्चेत आल्या आहेत.

कालपर्यंत घरापुढील आवाराच्या भिंतीवर, फाटकापुढे गाडी लावू नये, कुत्र्यापासून सावधान, कृपया चप्पल, जोडे बाहेर काढावे या आणि इतर अनेक प्रकारच्या सूचना लिहिलेल्या पाट्या घरावर आढळून येत होत्या. परंतु परतवाडा शहरातील काही घरांवर विनामास्क घरात प्रवेश नाही, असे फाटकावर अगदी दर्शनी भागात लिहून सुरक्षिततेचा उपाय नागरिकांनी अवलंबला आहे. वर्षभरापासून कोरोनामुळे अनेकांचे संसार उद्ध्वस्त झाले आहे. केव्हा आणि कुठून कोणाला याची लागण होईल, हे सांगणे कठीणच असल्यामुळे प्रत्येकाने स्वतःची काळजी स्वतः घेण्याच्या सूचना वर्षभरापासून प्रशासन देत आहे.

बॉक्स

राग आला तरी चालेल

तोंडाला मास्क तरच घरात

प्रवेश, असा खाक्या अनेकांनी अंगिकारला आहे. अनेकांच्या तोंडाला मास्क दिसत नसल्याने त्यांच्याशी नागरिक आता बोलणे टाळत आहेत. कोरोनाची लागण होण्याची दहशत सर्वांच्या मनात आहे. त्यामुळे घरावर दर्शनी भागातच पाट्या लावण्यात आल्या आहेत.