ना परवाना, ना विमा!

पान ३

चांदूर बाजार : शहरांसोबत ग्रामीण भागातसुद्धा आवश्यक कागदपत्रांशिवाय शेकडो वाहने रस्त्यावरून धावत आहेत. त्यात चोरीचा वाहने असण्याची दाट शक्यता वर्तविली जात आहे. बहुतांश वाहने परवाना व इन्शुरंसविना चालविली जात आहेत.

दिवसेंदिवस शहरात दुचाकी व चारचाकी वाहनांची संख्या वाढत चालली आहे. यात शहरात वाहतूक पोलिसांचा कोणतेच धाक नसल्याने अनेक अल्पवयीन तसेच विनापरवाना असलेले वाहनचालक सर्रासपणे वाहन चालवत आहेत. अनेक अल्पवयीन वाहनचालक मालवाहू वाहनेसुद्धा चालवत असून, त्याकडे पोलीस प्रशासनाने हेतुपुरस्सर दुर्लक्ष केले आहे. एवढेच नव्हे तर या वाहनांची कागदपत्रे नेमकी कोणी तपासावी, याबाबत पोलीस प्रशासनातसुद्धा एकमत नाही.

शहरात वाहतूक सुरळीत राहावी म्हणून वाहतूक शिपायाची नेमणूक करण्यात आली आहे. वाहतुकीचे नियम पाळावे, वाहनचालकाकडे परवाना नसेल, तर त्याच्या कागदपत्रांची तपासणी करावी व वाहतुकीला अडथळा आणल्यास त्या वाहनावर कारवाई करावी, यासाठी वाहतूक पोलिसांची नेमणूक असते. मात्र, शहरातील वाहतूक पोलीस कधीच रस्त्यावरील खोळंबलेली वाहतूक सुरळीत करताना दिसत नाहीत. वाहतूक पोलिसांकडून चारचाकी व दुचाकी वाहनांची तपासणी करताना येथे अद्यापही नागरिकांनी बघितले नाही. वाहतूक पोलीस केवळ मालवाहू वाहनांची अडवणूक करून पठाणी वसुली करीत असल्याचा आरोप स्थानिक नागरिकांतर्फे केला जात आहे.

बॉक्स १

स्थानिक पोलीस स्टेशनमध्ये महिन्यापूर्वी रुजू झालेले पोलीस निरीक्षक सुनील किणगे शहरातील वाहतूक व्यवस्था सुरळीत करतील, असा विश्वास नागरिकांना होता. मात्र, स्थानिक पोलिसांचे वाहतूक व्यवस्थेवर हेतुपुरस्सर दुर्लक्ष केले जात असल्याचा आरोप नागरिकांतर्फे केला जात आहे. शहरात दररोज शेकडो ऑटोरिक्षा, काळी-पिवळी वाहने, खासगी ट्रॅव्हल्स शासनादेशाची पायमल्ली करीत आहेत.

--------------------