वसतिगृहात नाही पाणी नाही, आदिवासी विद्यार्थ्यांचा उपायुक्तांच्या दालनाच ठिय्या

२०११ च्या शासननिर्णयानूसार वसतिगृहात सुविधा नसल्याचा आरोप.

अमरावती : शहरातील सोनल कॉलनी परिसरात भाड्याच्या इमारतीमध्ये असलेल्या आदिवासी वसतिगृहात मागील चार दिवसांपासून पाणी नसल्याने विद्यार्थ्यांची चांगलीच गैरसोय होत आहे. तसेच शासनाच्या निर्देशानुसार, आवश्यक सोयी-सुविधाही वसतिगृहात मिळत नाहीत. त्यामुळे संतप्त आदिवासी विद्यार्थ्यांनी मंगळवारी अपर आयुक्त आदिवासी विकास विभाग येथे धडक देत उपायुक्तांच्या दालनात ठिय्या आंदोलन केले.

आदिवासी विकास विभागाच्या वतीने आदिवासी विद्यार्थ्यांना शहरी भागात उच्च शिक्षण घेता यावे, याकरिता एक हजार विद्यार्थी क्षमतेचे शासकीय वसतिगृह चालविण्यात येत आहे; परंतु शहरातील आदिवासी वसतिगृहाची स्वत:ची इमारत नसून भाड्याच्या इमारतीमध्ये ही वसतिगृहे आहेत. या वसतिगृहामध्ये आवश्यक सोयीसुविधा नसल्याने विद्यार्थ्यांना अडचणींचा सामना करावा लागत आहे. 

मागील चार दिवसांपासून सोनल कॉलनी येथील वसतिगृहात पिण्याच्या पाण्याबरोबरच दैनंदिन वापरासाठी लागणारे पाणी नसल्याने विद्यार्थ्यांमध्ये संताप व्यक्त होत आहे. अशी परिस्थिती असताना देखील वसतिगृहातील वॉर्डन १५ दिवसांपासून वसतिगृहात आलेले नाहीत. तसेच वसतिगृहामध्ये शासनाच्या २०११ च्या शासन निर्णयानुसार, प्रत्येक वसतिगृहात स्वतंत्र ग्रंथालय, दहा विद्यार्थ्यांमागे एक कॉम्प्युटर व इंटरनेट सुविधा, प्रत्येक वसतिगृहात स्वच्छ पिण्याच्या पाण्यासाठी आरओ फिल्टर बसविणे, दर महिन्यातून एक वेळा विद्यार्थ्यांची आरोग्य तपासणी करणे, व्यायामासाठी जीमची व्यवस्था करणे, दररोज वसतिगृहाची स्वच्छता, स्पर्धा परीक्षेसाठी पुस्तकांची सुविधा त्याचबरोबर चार ते पाच वृत्तपत्रे अशा सुविधा देणे अपेक्षित आहे; परंतु वसतिगृहात यापैकी कोणत्याच सुविधा नसल्याचा आरोप विद्यार्थ्यांनी केला आहे. 

या मागणीला घेऊन विद्यार्थ्यांनी मंगळवारी आदिवासी विकास विभाग उपायुक्त कार्यालयात ठिय्या आंदोलन केले. यावेळी उपायुक्त जागृती कुमरे यांनी विद्यार्थ्यांना दिलेल्या लेखी आश्वासनानंतर आंदोलन मागे घेण्यात आले.